ქართული ოცნების პრესსამსახურის ინფორმაციით, თითქოს საქართველოს პარლამენტის თავმჯდომარის, ირაკლი კობახიძის სახელით გავრცელებული ინფორმაცია, რომ ქართული ოცნება არჩევნებში მხარს არა სალომე ზურაბიშვილს, არამედ ზურა ჯაფარიძეს დაუჭერს, სიცრუეა. მსგავსი შინაარსის წერილი ელექტრონულ ფოსტაზე On.ge-მაც მიიღო. შეტყობინება პარტიის ინფორმაციით, ირაკლი კობახიძის ყალბი მეილით იყო გაგზავნილი.

შეტყობინებაში სახელწოდებით "სასწრაფო" ირაკლი კობახიძის სახელით წერდნენ, რომ ის შეხვდა პარტიის პოლიტსაბჭოს თავმჯდომარეს ბიძინა ივანიშვილს, იმსჯელეს პრეზიდენტობის კანდიდატზე და გადაწყვიტეს, რომ საპრეზიდენტო არჩევნებზე მხარი სალომე ზურაბიშვილის ნაცვლად გირჩის ლიდერსა და პრეზიდენტობის კანდიდატს, ზურა ჯაფარიძეს დაუჭირონ.

შეტყობინებიდან ირკვევა, რომ წერილი On.ge-ს გარდა, ქართული ოცნების პოლიტსაბჭოს წევრებთანაც გაიგზავნა. On.ge არკვევს ნამდვილად მიიღეს თუ არა წერილი პოლიტსაბჭოს წევრებმა თუ ეს მისამართებიც შესაძლოა ყალბი იყოს.

ქართული ოცნების დეპუტატის, მამუკა მდინარაძის განცხადებით, მან შეტყობინება მაილზე მიიღო. როგორც მისთვისაა ცნობილი შეტყობინება პოლიტსაბჭოს სხვა წევრებმაც მიიღეს.

პარტია, ქართული ოცნების მიერ გავრცელებულ განცხადებაში ნათქვამია, რომ ირაკლი კობახიძის სახელით, ყალბი მისამართიდან ვრცელდება ცრუ ინფორმაცია ერთ-ერთი საპრეზიდენტო კანდიდატის მხარდაჭერის შესახებ. ქართული ოცნების პრესსამსახურის ცნობით, ეს არის დეზინფორმაცია და მოუწოდებს მედიასაშუალებებს ნუ შეუწყობენ ხელს ცრუ ინფორმაციის გავრცელებას.

On.ge-ს გირჩში განუცხადეს, რომ ისინი ქართული ოცნების თქმით, ყალბი მაილით გავრცელებულ შეტყობინებაზე ინფორმაციას არ ფლობენ.