ამერიკის შეერთებული შტატების ფასიანი ქაღალდების კომისიის ინფორმაციით, ილონ მასკი Tesla-ს დირექტორთა საბჭოს თავმჯდომარის პოსტს დატოვებს, თუმცა გენერალური დირექტორის თანამდებობას შეინარჩუნებს.

მასკს თანამდებობის დასატოვებლად 45 დღე აქვს. ის სამი წლის განმავლობაში დირექტორთა საბჭოს თავმჯდომარის პოსტს ვეღარ დაუბრუნდება.

Tesla დამოუკიდებელი დირექტორების ახალ კომიტეტს ჩამოაყალიბებს, დამატებით გააკონტროლებს და დააკვირდება მასკის კავშირებსა და მოქმედებებს.

ილონ მასკი და Tesla თითოეული მათგანი 20 მილიონ დოლარის ოდენობის ჯარიმას გადაიხდის. ჯამში 40 მილიონი დოლარი ჯარიმა ზიანის დამტკიცების პროცესში ინვესტორებზე გადანაწილდება.

აშშ-ის ფასიანი ქაღალდების კომისია ილონ მასკის წინააღმდეგ, თაღლითობის ბრალდებით საქმე აღძრა. ის ტვიტერში წერდა, რომ კომპანიის კერძო ფირმად გარდაქმნას გეგმავდა და გამოისყიდდა ყველა აქციას, თითოს - 420 დოლარად, რაც მათ საბაზრო ფასს აჭარბებდა. მოგვიანებით მან თავის გეგმებზე უარი თქვა. მასკის მოქმედებებმა გააჩინა ეჭვი, რომ მან ითაღლითა, რათა აქციების კურსზე გავლენა მოეხდინა.