თბილისის 74-ე საჯარო ბაგა-ბაღში ლგბტ თემთან ასოცირების გამო მშობელმა ბავშვების მიერ გაკეთებული ცისარტყელის ნახატები ჩამოხსნა. ამის შესახებ ბაგა-ბაღის ფეისბუქგვერდზე განცხადება გავრცელდა.

"ძვირფასო მშობლებო, ამ კვირაში ჯგუფის თემა იყო ცისარტყელა. ცისარტყელა, როგორც მოგეხსენებათ, შვიდი ფერისგან შედგება, თქვენმა შვილებმა თავიანთ მასწავლებლებთან ერთად გააკეთეს ფერადი ფურცლებისგან ცისარტყელები და ჩამოკიდეს თავიანთი ნამუშევარი. დღეს დილით თეო გოგელიას ჯგუფში (3/4)-ში ერთ-ერთმა მშობელმა უბრალოდ მოხსნა ეს ცისარტყელები და წაიღო. ამას ქურდობა ჰქვია. მიზეზი ვიცით, მაგრამ მე მრცხვენია თქვენ გამო და აქ არ ვიტყვი. მობრძანდით ადმინისტრაციაში და აგვიხსენით თქვენი დამოკიდებულება ფერებთან მიმართებით", — ნათქვამია ბაგა-ბაღის განცხადებაში.

ბაღის ადმინისტრაციის წარმომადგენელმა, მარიამ გოგოლაძემ On.ge-სთან საუბარში თქვა, რომ ერთ-ერთმა მშობელმა ანონიმურად დაუტოვათ წერილი, სადაც ეწერა: "ნუ გამოიყენებთ ლგბტ ფერებს."

ბაღის თანამშრომლის თქმით, მათ აქვთ სპეციალური ყუთი, სადაც ადმინისტრაციას შეუძლია მშობლებისგან წერილები მიიღოს.

ანონიმური წერილის მიღებისა და ერთ-ერთი ღონისძიების შემდეგ, რომელიც ცისარტყელას ეხებოდა, ბავშვების მიერ გაკეთებული ყველა ნამუშევარი ჩამოხსნილი დახვდათ.

ბაღის ადმინისტრაციის წარმომამდგენელი განმარტავს, რომ ამით ყველა იმ ბავშვის უფლება ირღვევა, ვისი ნაშრომიც "მოიპარეს" და ამიტომ ისინი მიმართავენ მშობლებს მივიდნენ და ახსნა-განმარტება ჩააბარონ ადმინისტრაციას.