საქართველოს მართლმადიდებელი ეკლესიის საპატრიარქომ აშშ-ის პრეზიდენტის, დონალდ ტრამპის ის განცხადება გაანიუსა, სადაც პრეზიდენტი ნარკოტიკებთან ბრძოლაზე საუბრობს. როგორც საპატრიარქოს ნიუსში წერია, დონალდ ტრამპმა მსოფლიოს ერთად მოქმედებისკენ მოუწოდა:

"ეს პრობლემა მსოფლიოს ყველა ერს ეხება. ნარკოტიკები აშშ-სა და მთელ მსოფლიოში უამრავ სიცოცხლეს ღუპავს. თუ ერთობლივად ვიმოქმედებთ მსოფლიოს სხვადასხვა კუთხეში მრავალ ადამიანს გადავარჩენთ. დღეს პირობას ვდებთ, რომ ამ საფრთხეს ერთად შევებრძოლებით".

მსგავსი სიახლეების განთავსება საპატრიარქოს ვებგვერდისთვის უჩვეულოა, რადგან მიმდინარე საერო მოვლენებსა და, მათ შორის, მსოფლიო ამბებს საპატრიარქო არ აშუქებს. თუმცა ამ შემთხვევაში დონალდ ტრამპის განცხადება ეხებოდა ნარკოტიკებთან ბრძოლას, რასაც ემხრობა საპატრიარქოც.

მარიხუანის კულტივაცია-ექსპორთან დაკავშირებულმა კანონპროექტმა საპატრიარქოში დიდი უკმაყოფილება გამოიწვია. ამის გამო პარლამენტმა კანონპროექტის განხილვის გადავადება გადაწყვიტა.

სასულიერო პირების ნაწილმა, თბილისის საკრებულოსთან პარაკლისი აღავლინა და შინაგან საქმეთა სამინისტროს მიერ კანაფის კონტროლის შესახებ კანონპროექტი კიდევ ერთხელ გააკრიტიკა.

პარაკლისის დასრულების შემდეგ, მრევლს მამა შალვა კეკელიამ მიმართა. მისი თქმით, ეკლესია ორ გადაწყვეტილებას აპროტესტებს: პირველი, საკონსტიტუციო სასამართლოს მიერ მარიხუანის მოხმარების ლეგალიზებას ეხება, ხოლო მეორე, კანაფის სამედიცინო მიზნებით კულტივაციასა და ექსპორტს.

მას შემდეგ, რაც გასაჯაროვდა, რომ შინაგან საქმეთა სამინისტრო კანაფის ექსპორტზე მუშაობდა საქართველოს საპატრიარქომ რადიკალური განცხადებები გააკეთა. ისინი შეეწინააღმდეგნენ ხელისუფლებას და განაცხადეს, რომ მზად არიან აჩვენონ საკუთარი ძალა.

სასულიერო პირებმა აქამდეც გამართეს საპროტესტო აქცია. მათ გააპროტესტეს მარიხუანის ლეგალური მოხმარების შესახებ საკონსტიტუციოს გადაწყვეტილება და ბათუმში, გამართულ აქციაზე საკონსტიტუციო სასამართლოს გაუქმება მოითხოვეს. პატრიარქმა კი განაცხადა, რომ ნარკოტიკების მოხმარებაზე ნების დართვა არის ერის მტრობა.