პენსილვანიის სასამართლომ 81 წლის ამერიკელ მსახიობს ბილ კოსბის სექსუალური ძალადობისთვის პატიმრობა მიუსაჯა. ამით კი მრავალწლიანი სასამართლო დავა დასრულდა. კოსბი დამნაშავედ ჯერ კიდევ 2018 წლის აპრილში სცნეს, ახლა კი სასამართლო სასჯელის სახეს განიხილავდა.

კოსბი საპატიმროში სამიდან ათ წლამდე გაატარებს, სასჯელის ზუსტი ზომა მოგვიანებით გახდება ცნობილი. გარდა ამისა, მას იმ პირთა სიაში შეიყვანენ, ვისაც სექსუალური ხასიათის დანაშაული აქვს ჩადენილი. თვითონ მსახიობს განაჩენი არ შეუფასებია.

ბრალდების მხარე კოსბისთვის ხუთიდან ათ წლამდე პატიმრობას ითხოვდა. მსახიობის ადვოკატები აპელაციის პერიოდში ითხოვდნენ, რომ ის შინაპატიმრობაში ყოფილიყო, თუმცა მოსამართლემ უარი უთხრა.

განაჩენის გამოტანის დროს მოსამართლემ ბილ კოსბის სექსუალური მხეცი უწოდა. მოსამართლემ მიიჩნია, რომ კოსბის ქმედებებმა სერიოზული გავლენა იქონიეს ანდრეა კონსტანდზე, რომელიც მსახიობს სექსუალურ ძალადობაში ადანაშაულებდა.

კონსტანდმა სასამართლოში სიტყვის გამოსვლის დროს აღნიშნა, რომ დიდი ხნის განმავლობაში ვერ გამოდიოდა იმ შოკიდან, რომელიც სექსუალური ძალადობის შედეგად მიიღო.

"მან მოიპარა ჩემი ცხოვრება, ჩემი გულწრფელობა, რწმენა საკუთარ თავში და გარშემომყოფებში", - განაცხადა ანდრეა კონსტანდმა პროცესზე.

კოსბის საქმე ეხება 2004 წლის ეპიზოდს. ანდრეა კონსტანდი ფილადელფიის უნივერსიტეტში კალათბურთის გუნდში მენტორად მუშაობდა. ბილ კოსბი უნივერსიტეტთან თანამშრომლობდა და კალათბურთით იყო დაინტერესებული. მათ ერთმანეთი ჯერ კიდევ 2002 წელს გაიცნეს და მეგობროდნენ.

როგორც კონსტანდი ყვება, ერთხელ კოსბიმ ის თავისთან სახლში მის მომავალზე სასაუბროდ მიიყვანა და განტვირთვისთვის რამდენიმე აბი მისცა. ანდრეა დათანხმდა და მალევე მიხვდა, რომ თავის სხეულს ვეღარ აკონტროლებდა. კონსტანდის თქმით, მსახიობი მასზე სექსუალურად ძალადობდა.

2006 წელს კონსტანდმა კოსბისთან წინასასამართლო შეთანხმება დადო, რომ ფულის სანაცვლოდ ინციდენტის შესახებ არ მოყვებოდა. მას შემდეგ, რაც კიდევ რამდენიმე მსგავს ინციდენტზე გახდა ცნობილი, კონსტანდი სასამართლოში წავიდა.

ანდრეა კონსტანდი სასამართლოს დატოვების შემდეგ. 25 სექტემბერი, 2018 წელი.

ფოტო: Reuters

კოსბის საპატიმროში გადაყვანის შემდეგ, მსჯავრის მოხდის დაწყებამდე გადაღებული მისი ფოტო გამოქვეყნდა. 25 სექტემბერი, 2018 წელი.

ფოტო: Montgomery County Correctional Facility