თბილისობა 2018-ის ორგანიზებისთვის თბილისის მერია 905 421 ლარის დახარჯვას გეგმავს. მუნიციპალიტეტი მომსახურებას ტენდერის გარეშე, პირდაპირი შესყიდვის წესით შეიძენს. ამისთვის უწყებამ შესყიდვების სააგენტოსგან თანხმობა უკვე მიიღო.

"ღონისძიებების სპეციფიკიდან გამომდინარე დაგეგმილ აქტივობათა უმრავლესობა საავტორო ნამუშევრებს წარმოადგენს. ამასთან, ზემოაღნიშნული აქტივობების მიმდინარეობის პარალელურად, იკვეთება კვალიფიციურ შემსრულებლებთან თანამშრომლობის საკითხები, რაც თავის მხრივ, დროში შეზღუდვას იწვევს", — ასე განმარტავს მერია მომსახურების ტენდერის გარეშე შესყიდვის მიზეზს.

დაგეგმილი ღონისძიებები

6 ოქტომბერი

მერიის ინფორმაციით, თბილისობის პირველ დღეს, 6 ოქტომბერს ახალი ქართული მიუზიკლი — "თბილისური ვოდევილი" გაიმართება. მიუზიკლში მონაწილეობას ქართული ესტრადის წარმომადგენლები, მსახიობები და მოცეკვავეები მიიღებენ. მიუზიკლი ევროპის მოედანზე, თემატურად დეკორირებულ სცენაზე ჩატარდება.

ამავე დღეს რიყის პარკი ყვავილების ფესტივალს — "შემოდგომის დღესასწაული" უმასპინძლებს, რომელიც ყვავილებით და შემოდგომის ნობათით გაფორმდება.

7 ოქტომბერი

თბილისის მერიის ინფორმაციით, ამ დღეს პირველი რესპუბლიკის მოედანზე, თბილისის საპატიო მოქალაქეების დაჯილდოება და გრანდიოზული გალა-კონცერტი გაიმართება. კონცერტში მონაწილეობას ევგენი მიქელაძის სახელობის ეროვნული მუსიკალური ორკესტრი ნიკოლოზ მემანიშვილის დირიჟორობით, სოლო შემსრულებლები, მუსიკალური ანსამბლები და გუნდი მიიღებს, რეჟისორი დავით დოიაშვილი იქნება.

კონცერტის ფეიერვერკით დასრულება იგეგმება.