მროველ-ურბნელმა მიტროპოლიტმა, მეუფე იობმა განაცხადა, რომ ხელისუფლება დაემსგავსა მარიონეტების თეატრს, რომელსაც ერთი ადამიანი მართავს. ამის შესახებ მან TV პირველთან ისაუბრა.

მეუფე იობს არ დაუკონკრეტებია ვის გულისხმობდა "ერთ ადამიანში" და აღნიშნა, რომ ამ ადამიანის მმართველობზე ყველა საუბრობს. მისივე თქმით, საკითხავი ის არის ვინ ამოქმედებს ამ პიროვნებას:

"ფინანსები, რომ მან არ დაკარგოს გავლენები, ფინანსები მოიხვეჭოს და ყველაფერზე მიდის, რომ ვიღაცის ნაკარნახევი შეასრულოს საქართველოში."

მეუფე იობმა ისაუბრა იმაზეც, რომ არჩევნებმა აზრი დაკარგა, რადგან წინასაარჩევნო დაპირებები არ სრულდება. მისივე თქმით, ამჟამინდელ არჩევნებშიც საპრეზიდენტო კანდიდატები იძლევიან ისეთ დაპირებებს, რომლის შესრულებასაც კონსტიტუციით ვერ შეძლებენ.

"არჩევნები არ ხდება ხალხის არჩევით, შეიძლება რაღაც ნაწილში, მაგრამ სრულად — არა. ხალხს აღარ აქვს სურვილი, რომ ვინმე აირჩიოს. შეიძლება სახელისუფლებო წრეებიდან, ვისაც სამსახური და რაღაც ვალდებულებები აქვს მათ მიიღონ არჩევნებში მონაწილეობა, რომ გაიხანგრძლივონ თავიანთი პირობები მომავალ ხელისუფლებაშიც", — განაცხადა მეუფემ.

ოპოზიციური პარტიები, არასამთავრობო ორგანიზაციები და საზოგადოების ნაწილი ქვეყნისა და მთავრობის ერთპიროვნულ მმართველად ქართული ოცნების დამფუძნებელს, ბიძინა ივანიშვილს მიიჩნევენ.