ხშირად ამბობენ, რომ სიყვარულს ყველაფრის დამარცხება შეუძლია, ქართველებს გამოთქმაც კი გვაქვს - “თუ სიყვარულია თოხის ტარზეც დაეტევი”. მე არასდროს მიცდია ამ ანდაზის რეალობაში გადმოტანა და არც თქვენ გირჩევდით, მაგრამ ეჭვიც არ მეპარება, რომ ნამდვილად ასეა.

მიუხედავად უამრავი მიზეზისა, რის გამოც შეგიძლიათ თქვათ, რომ ცუდ დროს დაიბადეთ, არ დაგავიწყდეთ, რომ რამდენიმე საუკუნით ადრე, თქვენი რაინდი სატრფოსთვის წერილის გაგზავნა, საუკეთესო შემთხვევაში, მტრედის საშუალებით მოგიწევდათ.

დღეს, კი, როდესაც ხშირად ვიმეორებთ თითქოს ტექნოლოგიებმა ადამიანური ურთიერთობები მოკლა, სინამდვილეში შეგვიძლია დავურეკოთ, ვემესიჯოთ, გავუგზავნოთ იმეილი, ფოტო და ვიდეოც კი, იმ ადამიანს, რომელთან ერთადაც თუ სიყვარულია თოხის ტარზეც კი დავეტევით.

ფოტო: TheTouch


სულ ცოტა ხნის წინ, TheTouch-მა ახალი მოწყობილობა შექმნა, რომელიც გაგაგებინებთ გატყუებთ თუ არა თქვენი შეყვარებული, როდესაც გეუბნებათ - “ისე მომენატრე, რომ გული ამიჩქარდა”. ბეჭდის დახმარებით საშუალება გექნებათ უმოკლეს დროში და იმ შემთხვევაშიც კი თუ ძალიან დიდი მანძილი გაშორებთ, ერთმანეთს საკუთრი გულისცემა გაუგზავნოთ.

ფოტო: TheTouch

TheTouch-ის მიერ მინიმალისტური დიზაინით შექმნილი ბეჭედი მეორე ბეჭედს უკავშირდება და რეალურ დროში გაგრძნობინებთ თქვენი სიყვარულის ობიექტის გულისცემას. ასე რომ, თუ სიყვარულია გულის ცემას ბლუთუზითაც იგრძნობ.

ეჭვიანმა ბაბულიკებმა, სხვა ფუნქციაც შეიძლება იპოვონ, მაგალითად, ტყუილის დეტექტორის.