საქართველოს პატრიარქის ქორეპისკოპოსი, მეუფე იაკობი აცხადებს, რომ თუ ხელისუფლება საქართველოში მარიხუანის კულტივირების საკითხს დაუშვებენ "ეკლესია დაუპირისიპირდება". მან განაცხადა, რომ ეკლესია გარკვეული პროცესების დროს დუმდა, თუმცა ის არ დასუსტებულა. მეუფის განცხადებით, ის "ერის ღალატს" არავის აპატიებს.

"ალბათ, ბევრმა იფიქრა, რომ რაღაც პროცესები რომ მიმდინარეობდა, დავსუსტდით და თუ აინტერესებს ვინმეს ჩვენი ძალა, არავის ვემუქრები, ნახავენ აუცილებლად ჩვენს ძალას", - განაცხადა მეუფე იაკობმა კონფერენციაზე "ნარკოპოლიტიკა საქართველოში – გამოწვევები და საერთაშორისო გამოცდილება". კონფერენცია საქართველოს მართლმადიდებელი ეკლესიის საპატრიარქოს მიერ არის ორგანიზებული.

მეუფე იაკობმა მარიხუანის სამედიცინო მიზნით წარმოება საქართველოში გააკრიტიკა. მისი თქმით, მსგავსი ნაბიჯი ქვეყნისთვის საფრთხეებს შეიცავს. ის ამ გადაწყვეტილებაში ავღანეთისა და კოლუმბიის მსგავს საფრთხეებს ხედავს.

შსს-მ მარიხუანის მოხმარებისა და სამედიცინო მიზნით ექსპორტზე გასატანად კანაფის კულტივაციის რეგულირებისთვის ახალი კანონპროექტი შექმნა. აღნიშნული საკანონმდებლო ცვლილებების პაკეტი მთავრობას დღეს წარედგინა და ის მარიხუანის მოხმარების მკაცრ სამართლებრივ ჩარჩოებში მოქცევას გულისხმობს.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რომლის მიხედვითაც მარიხუანის მოხმარებისთვის ადმინისტრაციული სასჯელი გაუქმდა. შინაგან საქმეთა სამინისტრომ მარიხუანის მოხმარების კანონპროექტზე სწორედ ამის შემდეგ დაიწყო მუშაობა.