გირჩის საპრეზიდენტო კანდიდატის, ზურა ჯაფარიძის თქმით, მარიხუანისგან წარმოებული მედიკამენტების ექსპორტზე გადატის ინიციატივა ნიშნავს, რომ ვიღაცას მრავალმილიონიან "ბიზნესს ხელში უგდებენ". მისივე თქმით, "ვიღაცებმა სარფიანი ბიზნესი დაინახეს და ამაზე მონოპოლიზაცია გადაწყვიტეს".

როგორც ჯაფარიძემ On.ge-ს უთხრა, მისთვის გაუგებარია, სამედიცინო მარიხუანის წარმოება რატომ უნდა ხდებოდეს ლიცენზიით.

"საერთოდ, რატომ უნდა ჰქონდეს ერთს [ლიცენზია] და რატომ უნდა ჰქონდეს შეზღუდულ არეალზე საერთოდ გაუგებარია. ეს ნიშნავს იმას, რომ ვიღაცას ხელში უგდებენ მრავალმილიონიან ბიზნესს. გირჩი იქნება, ვინც ამას არ დაუშვებს".

მისივე განმარტებით, ბევრი ინვესტორია, რომელსაც საქართველოში მსგავსი ბიზნესის წარმოება სურს.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანისგან წარმოებული მედიკამენტების ექსპორტზე გატანას გულისხმობს. აკაკი ზოიძის განმარტებით, აღნიშნული ინიციატივა მმართველმა გუნდმა 10 სექტემბრის უმრავლესობის სხდომაზე განიხილა.

"სამედიცინო მიზნით ექსპორტის ლიცენზიაზე იყო მსჯელობა, მაგრამ, საბოლოოდ, სანამ არ იქნება კანონპროექტი ვერ დაგიდასტურებთ, რომ ეს ინიციატივა კანონპროექტის საბოლოო ვერსიაში აისახება", — განაცხადა აკაკი ზოიძემ.

შინაგან საქმეთა სამინისტროში ადასტურებს, რომ განიხილავენ ექსპორტზე გასატანად სამედიცინო და კოსმეტიკური მიზნით მარიხუანის მოყვანა-წარმოების საკითხს.

"ნებისმიერ შემთხვევაში ქვეყნის შიგნით მარიხუანას გასაღება რჩება დასჯადი სისხლის სამართლის წესით", — განუმარტეს On.ge-ს შსს-ში.

მარიხუანის მიერ დამზადებული სამედიცინო მედიკამენტების მოხმარება ლეგალურია მსოფლიოს არაერთ ქვეყანაში, მათ შორისაა დიდი ბრიტანეთი, ავსტრალია, ნიდერლანდები, აშშ-ს ზოგიერთი შტატი, კანადა, ურუგვაი, ისრაელში და პორტუგალია.