აშშ სისხლის სამართლის საერთაშორისო სასამართლოსა და მის თანამშრომლებს სანქციებით ემუქრება, თუ ისინი ავღანეთში ამერიკელი ჯარისკაცების სამხედრო დანაშაულის გამოძიებას არ შეწყვეტენ. პრეზიდენტის, დონალდ ტრამპის მრჩეველმა თავდაცვის საკითხებში, ჯონ ბოლტონმა ჰააგას სასამართლოს აშშ-სა და მისი მოკავშირეებისთვის უკონტროლო და საშიში უწოდა.

ვაშინგტონში გამოსვლის დროს ბოლტონმა განაცხადა, რომ ავღანეთში ამერიკული მხარის სამხედრო დანაშაულისა და დაზვერვის მუშაობის ნებისმიერი გამოძიება მიჩნეული იქნება, როგორც უსაფუძვლო და უსამართლო.

"თუ სასამართლო ჩვენ მიმართ, ისრაელის ან სხვა მოკავშირეების მიმართ გამოძიებას დაიწყებს, ჩვენ ხელდაკრეფილები არ ვისხდებით", - აღნიშნა ბოლტონმა.

სანქციების მიღების შემთხვევაში ჰააგას სასამართლოს მოსამართლეებსა და პროკურორებს ქვეყანაში შესვლა აეკრძალებათ და მათი ანგარიშები გაიყინება. 2002 წელს აშშ-ს რომის სტატუტის რატიფიცირება არ მოუხდენია, რომლის საფუძველზეც შეიქმნა სისხლის სამართლის საერთაშორისო სასამართლო. ამის წინააღმდეგი იყო პრეზიდენტი ჯორჯ ბუში უმცროსი. თეთრი სახლის წინა ხელმძღვანელმა, ბარაკ ობამამ კი ორგანიზაციასთან თანამშრომლობისთვის რიგი ნაბიჯები გადადგა.