თანასწორობის მოძრაობა საქართველო-ლატვიას თამაშის დროს ლგბტ აქტივისტებსა და პოლიციელებს შორის დაპირისპირებას საგანგებო ბრიფინგით გამოეხმაურა.

თანასწორობის მოძრაობის წარმომადგენლების განცხადებით, თამაშზე მოსულ აქტივისტებს ლგბტ სიმბოლიკა ძალის გამოყენებით ჩამოართვეს და მათი სტადიონზე შეტანის საშუალება არ მისცეს.

მათივე განმარტებით, სტადიონზე აქტივისტებს მხოლოდ იმ ბანერების შეტანის საშუალება მისცეს, რომლებზეც გურამ კაშიას ლგბტ სამკლაური არ ეკეთა.

"ლგბტ აქტივისტები მოქმედებდნენ დინამოს სტადიონის წესების მიხედვით, რომელიც არ კრძალავს აღნიშნული მასალის სტადიონის ტერიტორიაზე შეტანას. სამართალდამცავების მხრიდან ცენზურის მიუხედავად, სტადიონზე რამდენიმე აქტივისტმა მაინც შეძლო გარკვეული ატრიბუტიკის მალულად შეტანა. თუმცა, ლგბტ დროშის გაშლისას, აქტივისტებს აღნიშნული დროშა პოლიციამ წაართვა",- განაცხადეს ორგანიზაციის წარმომადგენლებმა.

თანასწორობის მოძრაობის წარმომადგენლებმა ბრიფინგზე კიდევ ერთხელ გაუსვეს ხაზი, რომ ლგბტ ადამიანებისთვის გამოხატვის თავისუფლების შეზღუდვა წლების განმავლობაში ერთ-ერთ მთავარ გამოწვევად რჩება. აქტივისტების თქმით, კონსტიტუციით გარანტირებული გამოხატვის თავისუფლების უფლების რეალიზება საქართველოში ერთადერთი ჯგუფისთვის - ლგბტ ადამიანებისთვის - კვლავაც შეუძლებელია.

ორგანიზაციის წარმომადგენლების თქმით, ლგბტ სიმბოლიკას სახელმწიფო პროვოკაციად აღიქვამს და უსაფრთხოების უზრუნველსაყოფად, ძალადობრივად განწყობილი მოქალაქეების

"სახელმწიფომ კიდევ ერთხელ დასვა ტოლობის ნიშანი ჩაგრული ჯგუფსა და მოძალადე ფაშისტური დაჯგუფებებს შორის და მუქარას დაემორჩილა ლგბტ აქტივისტების გაჩუმების გზით", - განაცხადეს ორგანიზაციაში.

თანასწორობის მოძრაობა მიიჩნევს, რომ საქართველოს ხელისუფლება მსგავსი ნაბიჯებით ახალისებს ნეოფაშისტური დაჯგუფებების ძალადობრივ საქმიანობას საქართველოში.

"ჩვენი შეფასებით, შსს-ს ამგვარი ქმედებები მიანიშნებს იმაზე, რომ აღნიშნული ნეოფაშიტური ჯგუფები სახელმწიფოს ხელში აქტივისტების გასაჩუმებლად გამოიყენებიან", - აცხადებენ ორგანიზაციაში.

თანასწორობის მოძრაობა აპირებს მიმართოს საერთაშორისო ორგანიზაციებს, მათ შორის უეფას, რეაგირების მოსახდენად. პოლიციის მხრიდან დისკრიმინაციული მოტივით გამოხატვის თავისუფლების შეზღუდვის მიზეზით, თანასწორობის მოძრაობა მიმართავს გენერალურ ინსპექციას, სახალხო დამცველსა და სასამართლოს.