თბილისის საქალაქო სასამართლომ კანაფის მოყვანის და განსაკუთრებით დიდი ოდენობით მარიხუანის შენახვისთვის ბრალდებულ პატრულ-ინსპექტორს აღკვეთის ღონისძიების სახით პატიმრობა შეუფარდა.

სამართალდამცველებმა ბრალდებული 2018 წლის 6 სექტემბერს ჩოხატაურის მუნიციპალიტეტის სოფელ ჩხაკაურაში დააკავეს. შსს-ს ცნობით, ბრალდებულის საცხოვრებელი სახლის ჩხრეკისას და ეზოდან დათესილი და მოყვანილი 14 ძირი - 3 197,95 გრ კანაფი და 574,19 გრ. გამომშრალი მარიხუანა ამოიღეს.

პატრულ-ინსპექტორს ბრალდება სისხლის სამართლის კოდექსის 265-ე მუხლის მესამე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების შემცველი მცენარის უკანონო დათესვა და მოყვანა) და 2731 მუხლის მეექვსე ნაწილით (მარიხუანის უკანონო შენახვა, ჩადენილი განსაკუთრებით დიდი ოდენობით) წარუდგინეს.

სისხლის სამართლის საქმეზე გამოძიებას შინაგან საქმეთა სამინისტროს გენერალური ინსპექცია აწარმოებს. ბრალდება 6-დან 12 წლამდე თავისუფლების აღკვეთას ითვალისწინებს.