აშშ-ის პრეზიდენტის, დონალდ ტრამპს მიაჩნია, რომ ჰელსინკიში ვლადიმერ პუტინთან გამართული სამიტი, მისი ერთ-ერთი საუკეთესო შეხვედრა იყო.

"მათ სურდათ, რომ იმ სცენაზე ბოქსის მატჩი მქონოდა. შესანიშნავი შეხვედრა გქვონდა. ჩვენ ვისაუბრეთ უკრაინასა და სირიაზე. ვსაუბრობით ისრაელის უსაფრთხოებაზე. იმდენ შესანიშნავ საკითხზე ვისაუბრეთ, მაგრამ ისინი მოგვიბრუნდნენ და თქვეს, რომ ეს იყო საშინელება", - განაცხადა პრეზიდენტმა.

16 ივლისს ჰელსინკიში აშშ-სა და რუსეთის ლიდერებმა პირისპირ ორ საათზე მეტხანს ისაუბრეს და შემდეგ ერთობლივ პრესკონფერენციაზე ჟურნალისტების კითხვებს უპასუხეს. დონალდ ტრამპის ზედმეტად რბილმა ტონმა და ამერიკული სადაზვერვო სამსახურების მიმართ მისმა უნდობლობამ ამერიკელი სენატორების იმედგაცრუება გამოიწვია.

დონალდ ტრამპმა ჰელსინკის შეხვედრის დროს თავდაპირველად განაცხადა, რომ ვერ ხედავდა მიზეზს, რატომ შეიძლება რუსეთი 2016 წლის არჩევნებში ჩარეულიყო, მოგვიანებით კი თქვა, რომ შეცდომა დაუშვა და საპირისპიროს გულისხმობდა: კერძოდ კი, ფრაზას - "ვერ ვხედავ მიზეზს, რატომ არ ჩაერეოდა რუსეთი არჩევნებში".

CBS-ის ჟურნალისტის კითხვაზე, არის თუ არა პუტინი პასუხისმგებელი არჩევნებში ჩარევაზე, პრეზიდენტმა უპასუხა: "დიახ, არის. როგორც მე ვარ ამ ქვეყანაში მომხდარ მოვლენებზე პასუხისმგებელი, ისევე არის პუტინიც რუსეთთან დაკავშირებით. როგორც ქვეყნის ლიდერს, სწორედ მას ვაკისრებ პასუხისმგებლობას".

ეს პირველი შემთხვევა იყო, როცა დონალდ ტრამპმა ღიად დაადასტურა აშშ-ის საარჩევნო პროცესში რუსეთის კვალის არსებობა.

ამავე თემაზე: