თბილისის საქალაქო სასამართლოში ფაშისტური მოძრაობის ლიდერის, გიორგი ჭელიძის საქმეს განიხილავენ. სასამართლო მსვლელობისას ადვოკატმა, გაიოზ ჩარკვიანმა განაცხადა, რომ საქართველო მსოფლიოს ხუთ გადაშენებად ქვეყანაში იმყოფება და ყველამ მომავალზე უნდა იზრუნოს. ჩარკვიანმა მიმართა სასამართლოს და განაცხადა "ნუ მივცემთ საშუალებას, რომ ქართველი ადამიანი იყოს ციხეში გამოკეტილი".

ჭელიძის ადვოკატმა ქსენოფობიური და ჰომოფობიური განცხადებები გაავრცელა და თან განმარტა რომ "ფაშიზმი" ერთობას ნიშნავს:

"მაგრამ მომავალი სად არის? თუ ჩართავთ ტელევიზორს ერთი ღაღადებს რუსეთს მეორე ევროპას, სად არის ქართული ტრადიცია? ჩავრთავთ ტელევიზორს და გვესმის, დაიღუპა ნარკოტიკით, სად არის აქ ისევ ქართული ტრადიცია?..

ოჯახის სიწმინდის დღეს დააკავეს, გამოდიან ევროპელი პოლიტიკოსები და იძახიან ფაშისტები და სვასტიკიანები დადიანო? ეს რას ნიშნავს? განვმარტავ ფაშიზმი არის ლათინური სიტყვა და ერთობას ნიშნავს", - აღნიშნა ადვოკატმა.

თბილისის საქალაქო სასამართლო ფაშისტური მოძრაობის, საქართველოს ეროვნული ერთობის ლიდერის, გიორგი ჭელიძის აღკვეთის ღონისძიების საკითხზე მსჯელობს. გოიორგი ჭელიძეს ბრალად იარაღის უკანონო შეძენა-შენახვა-ტარება ედება. ბრალდების მხარე აღკვეთი ღონისძიების სახით პატიმრობის შეფარდებას ითხოვს.