თბილისის მერიის ინფორმაციით, პუშკინის ქუჩაზე ორმხრივი საავტომობილო მოძრაობა მომავალ კვირაში 15 აგვისტოს გაიხსნება.

"ახალი ესტაკადა საცობებისგან განტვირთავს ქალაქის მნიშვნელოვან ნაწილს - თავისუფლების მოედანს, მაჩაბელის, აფხაზის, ჭანტურიას, ფურცელაძის, თაბუკაშვილის, ლაღიძის, ლეონიძის, ბესიკის, ათონელის, ვირსალაძის, ვაჩნაძის, უკრაინკას, პუშკინისა და სხვა ახლომდებარე ქუჩებს, ასევე, გამსახურდიას სახელობის მარჯვენა სანაპიროს" - აცხადებს მერია.

ესტაკადა ლითონის კონსტრუქციით არის ნაგები და ახალი ხიდის სიმაღლის დონე თითქმის არსებული გზის შესაბამისია. მერიაში აცხადებენ, რომ ახალი ესტაკადა ძველი ქალაქის სტილში ჩაჯდება.

თბილისის მერიის ცნობით, მოწყობილია საფეხმავლო ბილიკიც, რაც გადაადგილების კუთხით ფეხით მოსიარულეებს კომფორტს შეუქმნის.

სამშენებლო სამუშაოებს პუშკინის ქუჩაზე თბილისის მერიის კეთილმოწყობის საქალაქო სამსახურის დაკვეთით, კომპანია CRP აწარმოებს. პროექტზე დედაქალაქის ბიუჯეტიდან 4 400 000 ლარია გამოყოფილი.