ქართული ოცნების დეპუტატის, საგამოძიებო კომისიის წევრის მამუკა მდინარაძის განცხადებით, სერგი კაპანაძის განცხადება იმის შესახებ, რომ უმრავლესობა კომისიის მუშაობას ბოიკოტს უცხადებს, საზოგადოების შეცდომაში შეყვანაა.

მისი განცხადებით, საზოგადოება ელოდა აბსოლუტურად განსხვავებულ შედეგს - ჭეშმარიტების დადგენას და არა მათ პოლიტიკურ პროგრამას.

"მოცემულ შემთხვევაში ორდღიან, მოკლეფეხებიან ტყუილსაც არ ერიდებიან და საზოგადოების დაჯერებას ცდილობენ, თითქოს ჩვენ კომისიის ბოიკოტირებას ვახდენთ. ურცხვად მოგვიწოდებენ, რომ შევუერთდეთ კომისიის მუშაობას. ეს მაშინ, როდესაც სხდომაზევე დავაფიქსირეთ, რომ ბოლო მომენტში გადმოგზავნილ, საშინლად არაკომპეტენტურ და პოლიტიკურად ანგაჟირებულ დასკვნის პროექტზეც კი განსხვავებულ მოსაზრებებს ორშაბათსვე წარმოვადგენდით", - განაცხადა მამუკა მდინარაძემ.

პირველ სექტემბერს გამართულ საგამოძიებო კომისიის სხდომაზე არდასწრების ფაქტს გამოეხმაურა ქართული ოცნების დეპუტატი ანრი ოხანაშვილიც. მისი თქმით, სერგი კაპანაძის განცხადება არის უპასუხისმგებლო, კომისიის თავმჯდომარემ ასეთი სიცრუე არ უნდა იკადროს.

"ვინაიდან დასკვნის ბოლო ვერსია გუშინ გადმოგვცეს, გუშინდელ სხდომაზევე დავაფიქსირეთ, რომ ჩვენ მოსაზრებებს კომისიას ორშაბათის სხდომაზე წარვუდგენდით. წინასწარ გააკეთეს ხმამაღალი განცხადებები, შედეგი ვერ დადეს ასეთი ხმაურიანი და ახლა ცდილობენ ყურადღება მიიქციონ", - განაცხადა ანრი ოხანაშვილმა.

ხორავას ქუჩაზე მომხდარი მკვლელობის საქმეზე შექმნილი დროებითი საგამოძიებო კომისიის პირველი სექტემბრის სხდომას მმართველი გუნდი არ ესწრებოდა.

ამის მიზეზი 31 აგვისტოს ხმაურიანი სხდომაა, რა დროსაც ქართული ოცნება ევროპულ საქართველოსთან საბოლოო დასკვნაზე ვერ შეთანხმდა.

სერგი კაპანაძის განცხადებით, ქართული ოცნების დეპუტატების გადაწყვეტილება ბოიკოტი გამოუცხადოს კომისიის მუშაობას, გაუმართლებელი და ყოვლად მიუღებელია.

"უარის თქმა, არ აჩვენებს საქმისადმი მაღალ პასუხისმგებლობას", - განაცხადა სერგი კაპანაძემ.

ამავე თემაზე: