პრეზიდენტობის დამოუკიდებელმა კანდიდატმა, სალომე ზურაბიშვილმა გერმანიის კანცლერის, ანგელა მერკელის საქართველოში ვიზიტი შეაფასა და თქვა, რომ მისი აზრით, მნიშვნელობა არ აქვს რა სიტყვები გამოიყენა კანცლერმა. ამის შესახებ პრეზიდენტობის კანდიდატმა 25 აგვისტოს, ქუთაისში მხარდამჭერებთან შეხვედრის შემდეგ ჟურნალისტებთან განაცხადა.

ზურაბიშვილის თქმით, საქართველოს პარტნიორი ქვეყნები "ერთნი" არიან და მისივე აზრით, ეს გამოჩნდა ნათლად, იმ საკითხებზე საუბრისას, რომლებიც საქართველოსთვის სასიცოცხლოა:

"არ მესმის ის რაღაცა ბჭობა იმის შესახებ, რა სიტყვები იხმარა [მერკელმა], რა მომენტში, თუ როგორ? იმიტომ რომ ეს არის მუდმივი რუსული მცდელობა, გავარჩიოთ ჩვენი მომხრე ქვეყნები ევროკავშირში, ან ნაკლებად მომხრე, უფრო რუსეთთან ურთიერთობების დალაგების მომხრე. ასე არ შეიძლება ქვეყნების დალაგება".

გერმანიის კანცლერი ანგელა მერკელი საქართველოს 10 წლის შემდეგ, ოფიციალური ვიზიტით 23-24 აგვისტოს ეწვია. კანცლერმა ორდღიანი ვიზიტის განმავლობაში სიტყვა "ოკუპაცია" პირველად სტუდენტებთან შეხვედრის დროს გამოიყენა. მან რუსეთს ოკუპანტი უწოდა, ხოლო საქართველოს პერსპექტიული. კანცლერის სკეპტიკური პოზიცია საქართველოს ნატოსა და ევროკავშირში გაწევრიანებაზე უცვლელი დარჩა.

გაიგეთ მეტი ანგელა მერკელის საქართველოში ვიზიტის შესახებ: