გერმანიის კანცლერის ანგელა მერკელის ვიზიტს, რომლის ფარგლებშიც ერთ-ერთი მთავარი განსახილველი საკითხი ეკონომიკური თანამშრომლობაა, ეკონომიკის მინისტრი გიორგი ქობულია არ დაესწრება. ეკონომიკის სამინისტროს პრესსამსახურში On.ge-ს განუცხადეს, რომ მინისტრი შვებულებაშია.

გავრცელებული ინფორმაციით, გიორგი ქობულია რუსეთში იმყოფება. On.ge-მ ამის შესახებაც კითხა სამინისტროს პრესსამსახურის წარმომადგენელს, რომელმაც ინფორმაცია არც უარყო და არც დაადასტურა.

"ჩვენ ვადასტურებთ, რომ არის შვებულებაში", - განუცხადეს On.ge-ს ეკონომიკის სამინისტროში.

მთავრობის ადმინისტრაციაში გამართულ გაფართოებულ შეხვედრაზე ეკონომიკის მინისტრის ნაცვლად ანგელა მერკელს, მინისტრის მოადგილე გიორგი ჩერქეზიშვილი შეხვდება.

საქართველოს საგარეო საქმეთა მინისტრის, დავით ზალკალიანის თქმით, ვიზიტის ფარგლებში დაგეგმილ შეხვედრებზე საუბარი შეეხება ორმხრივ ურთიერთობებს, მრავალმხრივ ფორმატებში თანამშრომლობას.

„ამ ვიზიტს ექნება ძალიან მნიშვნელოვანი ეკონომიკური კომპონენტი. იგეგმება ეკონომიკური ფორუმი. დელეგაციაში იქნებიან წამყვანი გერმანული კომპანიების წარმომადგენლები და ჩვენ ვისაუბრებთ იმაზე, რომ ჩვენი ეკონომიკური ურთიერთობების დონე მაღალ პოლიტიკურ ურთიერთობებთან თავსებადობაში უნდა იყოს“, – განაცხადა დავით ზალკალიანმა.

გერმანიის კანცლერი ანგელა მერკელი საქართველოს ორდღიანი ვიზიტით 23 აგვისტოს ეწვევა.