წერილში, რომლითაც რომის პაპმა ფრანცისკემ კათოლიკურ ეკლესიას მიმართა, პედოფილიაში მხილებული სასულიერო პირები საჯაროდ დაგმო. ამის შესახებ ინფორმაციას BBC ავრცელებს.

წერილი სახელწოდებით "ხალხის ღმერთი" ეკლესიაში "სიკვდილის კულტურაზე" ამახვილებს ყურადღებას, ძალადობრივ ქმედებებს გმობს და პატიებას ითხოვს.

გასულ კვირას პენსილვანიის უზენაესმა სასამართლომ ნაფიც მსაჯულთა ანგარიში გამოაქვეყნა, რომელშიც კათოლიკური ეკლესიის 300-მდე საეკლესიო პირი სექსუალურ ძალადობაში დამნაშავედ ცნო. დოკუმენტი ბოლო 70 წლის მოვლენებს ასახავს. ამ ხნის განმავლობაში სექსუალური ძალადობის მსხვერპლი 1000-ზე მეტი ბავშვი გახდა.

მას შემდეგ რაც დოკუმენტი გასაჯაროვდა, ოფიციალურმა ვატიკანმა განაცხადა, რომ პაპი იდგა მსხვერპლების გვერდით და "მტაცებელი მღვდლების" წინააღმდეგ.

გასულ თვეში, აშშ-ის კათოლიკური ეკლესიის ერთ-ერთი ყველაზე ცნობილი ფიგურა სექსუალური ძალადობის სკანდალში გაეხვა, რის გამოც რომის პაპმა ფრანცისკემ კარდინალ თეოდორ მაკარიკის საეკლესიო წოდება ჩამოართვა.

ადელაიდის არქიეპისკოპოსი, ფილიპ ვილსონი, მსოფლიოში ყველაზე მაღალი რანგის კათოლიკეა, რომელსაც პედოფილიაში ბრალი დასდეს.