თურქეთის დედაქალაქ ანკარაში აშშ-ს საელჩოს ცეცხლი გაუხსნეს. ამის შესახებ ინფორმაციას როიტერსი CNN-ის თურქეთის ბიუროზე დაყრდნობით ავრცელებს.

ადგილობრივი დროით, 05:00 საათზე აშშ-ის დიპლომატიური წარმომადგენლობის მიმართულებით ოთხი ან ხუთი გასროლა განხორციელდა.

პოლიციის ინფორმაციით, ეძებენ თავდამსხმელს, რომელმაც თეთრი ფერის მსუბუქი ავტომობილიდან ისროლა და მიიმალა. ინციდენტის შედეგად არავინ დაშავებულა.

როიტერსის ცნობით, ანკარასა და ვაშინგტონს შორის ურთიერთობა მას შემდეგ დაიძაბა, რაც თურქეთში ამერიკელი პასტორი ენდრიუ ბრანსონი დააკავეს.

ერდოღანი მოითხოვს მისი ყველაზე დიდი მტრის, ფეთჰულა გიულენის გადაცემას თურქეთისთვის. გიულენი 1999 წლიდან ამერიკაში ცხოვრობს. სწორედ გიულენს მიიჩნევს ერდოღანი 2016 წლის სამხედრო აჯანყების ორგანიზატორად.

თავის მხრივ, აშშ ერდოღანისგან ამერიკელი პასტორის ენდრიუ ბრანსონის გათავისუფლებას ითხოვს. თურქეთი ბრენსონს ტერორიზმსა და ფეთჰულა გიულენის ორგანიზაციის წევრობას ედავება. ამერიკელმა პასტორმა 21 თვე თურქულ საპატიმროში გაატარა, ხოლო წინა თვეში მისი ჯანმრთელობის მდგომარეობის გაუარესების გამო მას პატიმრობა შინა პატიმრობით შეუცვალეს.