თავდაცვის ყოფილი მინისტრის თინა ხიდაშელის განცხადებით, წითელაშვილის სამხედრო ობიექტზე შესვლის დროს, კონკრეტულ ბაზას საიდუმლო სტატუსი ჰქონდა.

ხიდაშელმა დღეს, 8 აგვისტოს, მუხადგვერდის ძმათა სასაფლაოზე მედიის წარმომადგენლებთან ისაუბრა. იგი არ ეთანხმება იმ მოსაზრებას, რომ სარეჟიმო წესი იმ დროს არ დარღვეულა:

"ეს ადამიანი მე გავანთავისუფლე სამინისტროდან მას შემდეგ, რაც გავარკვიე რომ ადგილი ჰქონდა ასეთ შემთხვევას. არ ვეთანხმები სარეჟიმო წესის დარღვევის შესახებ გაკეთებულ განცხადებებს, ვნახოთ რას იტყვის გამოძება. ნამდვილად არ შემიძლია იმ ობიექტების მისამართების დასახელება, რომელზეც საუბარია მაგრამ შემიძლია გითხრათ, რომ ეს საიდუმლო ობიექტები იყო. ამის დადასტურება მარტივად შემიძლია იმ ფაქტით, რომ ერთ-ერთ უშიშროების საბჭოს სხდომაზე ჩვენ მოვხსენით მას საიდუმლო სტატუსი, მანამდე ის საიდუმლო დაწესებულება იყო. სხვანაირად ვერ მოვხსნიდით მას ამ სტატუსს".

თავდაცვის ყოფილმა მინისტრმა მინდია ჯანელიძემ რუსთავი 2-თან საუბრისას სამხედრო ობიექტებიდან ინფორმაციის შესაძლო გაცემის საქმეზე განაცხადა, რომ ტრისტან წითელაშვილი არცერთ საიდუმლო ბაზაზე არ ყოფილა.

გაერთიანებული შტაბის ყოფილი უფროსი, გენერალი გიგი კალანდაძე 31 ივლისის გადაცემა პოსტსკრიპტუმთან ინტერვიუში აცხადებს, რომ აგვისტოს ომის შემდეგ საქართველოს ტერიტორიაზე აშენებული საიდუმლო სამხედრო ობიექტების კოორდინატები და მთელი ინფორმაცია, მინდია ჯანელიძის მინისტრობის დროს, სხვა ქვეყნის სპეცსამსახურების ხელში აღმოჩნდა.

კალანდაძე აზუსტებს ინტერვიუში, რომ საუბარია, იმ საცეცხლე წერტილებზე და ცენტრალური მართვის შტაბზე, რომელსაც რუსული აგრესიის შემთხვევაში, საქართველო მტრისაგან უნდა დაეცვა.

რუსთავი 2-ის მიერ მოპოვებული მასალის თანახმად, ტრისტან წითელაშვილი, რომელზეც გენერალური კალანდაძე საუბრობს, ყოფილი სამხედროა.

პოლკოვნიკი წითელაშვილი, 2008 წლის აგვისტოს ომის შემდეგ დააკავეს და სამშობლოს ღალატისთვის პატიმრობა მიუსაჯეს. 2013 წლის იანვარში, ხელისუფლებაში ქართული ოცნების მოსვლის შემდეგ მან ციხე დატოვა.

კალანდაძე ინტერვიუში ამტკიცებს რომ წითელაშვილი, საცეცხლე წერტილებზე მინდია ჯანელიძის მინისტრობის დროს დანიშნულმა, გენინსპექციის თანამშრომელმა გოდერძი ორმოცაძემ შეიყვანა, რომელმაც საიდუმლო ბაზაზე შესვლა სამსახურეობრივი საშვით შეძლო.