საქართველოს სახალხო დამცველის აპარატის ინფორმაციით, ქვემო ქართლის რიგ სოფლებში სანიტარულ-ჰიგიენური ნორმები საგანგაშო მდგომარეობაშია. პრობლემების აღმოფხვრის რეკომენდაციით ომბუდსმენის აპარატმა ქვემო ქართლის მუნიციპალიტეტებს მიმართა.

აპარატის ინფორმაციით, მარნეულის, წალკის, გარდაბნისა და დმანისის მუნიციპალიტეტების რიგ სკოლებში 2018 წლის ივნისში ჩატარებულმა მონიტორინგმა აჩვენა, რომ სასკოლო გარემო და ინფრასტრუქტურული პირობები, ისევე როგორც, წყლის ხელმისაწვდომობისა და სანიტარიულ-ჰიგიენური მდგომარეობის მხრივ არსებული მდგომარეობა საგანგაშოა და დაუყოვნებლივ უნდა მოწესრიგდეს.

ომბუდსმენის აპარატის თანამშრომლების მიერ აღმოჩენილი პრობლემები:

  • სოფელ ქვემო ყულარის, სოფელ ნაგების და დაბა თრიალეთის საჯარო სკოლებს არ მიეწოდება სასმელი და ტექნიკური გამოყენების წყალი და საერთოდ არ ფუნქციონირებს წყალმომარაგების სისტემა;
  • სოფელ იმირის საჯარო სკოლაში ხელმისაწვდომია მხოლოდ ტექნიკური გამოყენების წყალი, ხოლო სასმელ წყალს სკოლის მოსწავლეები და თანამშრომლები ადგილობრივი მოსახლეობის ეზოებიდან იღებენ;
  • ანტისანიტარული მდგომარეობაა სკოლების საპირფარეშოებში, ხოლო სოფელ ზემო ყულარის სკოლას საკუთარი ტუალეტი არ აქვს. მოსწავლეების თქმით, ისინი მაქსიმალურად ცდილობენ მხოლოდ უკიდურესი აუცილებლობისას ისარგებლონ საპირფარეშოთი;
  • რიგ შემთხვევებში, განსაკუთრებით სოფლად მდებარე სკოლებში, ბავშვებს არ აქვთ ხელის დაბანისა და საკმარისი რაოდენობის წყლის მიღების შესაძლებლობა.

ამავე თემაზე: ომბუდსმენი: ახმეტის სხვადასხვა ბაგა-ბაღში სანიტარულ-ჰიგიენური პრობლემებია