სოხუმში ნიგერიელი სტუდენტებისა და დე ფაქტო აფხაზეთის რესპუბლიკის ახალგაზრდული ნაკრების მატჩი გაიმართა. სახელისუფლებო მედიის ინფორმაციით, საფეხბურთო თამაშს დაესწრნენ დე ფაქტო პრეზიდენტი რაულ ხაჯიმბა და ე.წ. მთავრობის სხვა წარმომადგენლები. მატჩი აფხაზეთის დე ფაქტო ნაკრების სასარგებლოდ 4:0 დასრულდა.

ოკუპირებული აფხაზეთის სპორტის კომიტეტის ხელმძღვანელმა მატჩის დაწყების წინ განაცხადა, რომ ისინი ხშირად აწყდებიან "არაკეთილგანწყობილი მეზობლის" ქმედებებს როგორც პოლიტიკაში, ისე სპორტში. მისივე თქმით, ყველა პოლიტიკური ასპექტის მიუხედავად, სოხუმში საერთაშორისო მატჩი ჩატარდება.

მანამდე, მედიაში გავრცელდა ინფორმაცია, რომ სოხუმში, თითქოს, ნიგერიის ახალგაზრდული ნაკრები უნდა ჩასულიყო. ამასთან დაკავშირებით საქართველოს ფეხბურთის ფედერაციამ მსოფლიო ფეხბურთის მმართველ ორგანიზაციას, ფიფას მიმართა და რეაგირებისკენ მოუწოდა.

საქართველოს ფეხბურთის ფედერაციის პროტესტი არ მოეწონათ ოკუპირებულ ტერიტორიაზე და სპორტის პოლიტიზირებაში დაადანაშაულეს.

როგორც ფიფამ ფეხბურთის ფედერაციას აცნობა, აფრიკის კონტინენტზე ორგანიზაციის ოფიციალური წარმომადგენელი ნიგერიის ფეხბურთის ფედერაციის ხელმძღვანელობას დაუკავშირდა, სადაც ოფიციალურად უარყვეს ინფორმაცია ნიგერიის რომელიმე ასაკობრივი ნაკრების სოხუმში ჩასვლის თაობაზე.