ბორჯომში აბონენტების უმრავლესობას ელექტროენერგია სტაბილურად მიეწოდება, დღის განმავლობაში კი სრულად აღდგება. ამის შესახებ ენერგო-პრო ჯორჯია ფეისბუკის გვერდზე განცხადებას ავრცელებს.

როგორც განცხადებაში წერია, ტექნიკური სამსახური საგანგებო ვითარებაში მუშაობას ამ წუთებშიც აგრძელებს:

"მობილიზებულია კომპანიის არა მარტოადგილობრივი, არამედ სხვა მომსახურების ცენტრების ტექნიკური ბრიგადები. ბორჯომში იმყოფება, აგრეთვე, კომპანიის მენეჯმენტი და ადგილზე აკონტროლებს სამუშაოების მიმდინარეობას. ტექნიკური ბრიგადების ოპერატიული მუშაობის შედეგად, ამ დროისთვის ელექტროენერგიის გარეშე დარჩენილია მხოლოდ 1000 აბონენტი".

ენერგო-პრო ჯორჯიას განმარტებით, გუშინ ღამე, ძლიერი წვიმისა და სეტყვის გამო, მოტეხილმა ხეებმა დააზიანა ელექტროენერგიის გადამცემი ხაზები და ბოძები, რამაც გამოიწვია ბორჯომში 6 000-ზე მეტი აბონენტისთვის ელექტროენერგიის მიწოდების შეწყვეტა. მათივე თქმით, დღის განმავლობაში კომპანიის აბონენტებისთვის ელექტროენერგიის მიწოდება სრულად აღდგება.

ძლიერი წვიმა და სეტყვა ბორჯომის მუნიციპალიტეტში 4 აგვისტოს ღამით დაიწყო და დაახლოებით ნახევარ საათს გაგრძელდა, რის შედეგადაც ბორჯომის ქუჩები და სახლების პირველი სართულები დაიტბორა. აღნიშნულის გამო შეწყდა ელექტროენერგიის მიწოდება.