შინაგან საქმეთა სამინისტრომ საგამოძიებო მოქმედებების შედეგად განსაკუთრებით მძიმე დანაშაულის დაფარვის ბრალდებით წალენჯიხის საკრებულოს თანამშრომელი და მასთან ერთად 2 პირი დააკავა. გარდა ამისა, კიდევ ერთი პირია დაკავებული დანაშაულის შეუტყობინებლობის ბრალდებით.

შსს-ს ვერსიით, დანაშაულის დაფარვის ბრალდებით დაკავებულთაგან ორმა მიმდინარე წლის 12 ივლისს თბილისში, ჟონეთის ქუჩაზე მომხდარი მკვლელობის შესახებ მნიშვნელოვანი ინფორმაცია იცოდა, თუმცა გამოძიებასთან არცერთმა მათგანმა არ ითანამშრომლა.

შსს-ს ინფორმაციით, აღნიშნული დაკავებულების დახმარებით თბილისში მომხდარ განზრახ მკვლელობაში ბრალდებული პირი წალენჯიხაში ჩავიდა და მესამე დაკავებულის სახლში ორი დღის განმავლობაში იმალებოდა. როგორც შსს იტყობინება, მკვლელობაში ბრალდებული აფხაზეთის ტერიტორიაზე გადასვლას გეგმავდა. პოლიციამ დანაშაულის დაფარვაში ბრალდებული ორი პირი თბილისში, მესამე კი წალენჯიხაში დააკავა.

რაც შეეხება მეოთხე, დანაშაულის შეუტყობინებლობის ბრალდებით დაკავებულს, შსს-ს ცნობით, იგი 12 ივლისს ჟონეთის ქუჩაზე, შემთხვევის ადგილზე იყო, მკვლელობის შემდეგ კი მიიმალა და მომხდარის შესახებ სამართალდამცველებს არ შეატყობინა.

საქმეზე გამოძიება დანაშაულის დაფარვისა და დანაშაულის შეუტყობინებლობისთვის, საქართველოს სისხლის სამართლის კოდექსის 375-ე და 376-ე მუხლებით მიმდინარეობს.