საავადმყოფოებს ბაქტერიებთან ბრძოლისთვის ახალი სტრატეგიების შემუშავება მოუწევთ. მეცნიერებმა აღმოაჩინეს, რომ საავადმყოფოებში გავრცელებულ ბაქტერიებს ალკოჰოლზე დაფუძნებული სადეზინფექციო საშუალებები ვეღარ ანადგურებს.

ალკოჰოლის შემცველი სადეზინფექციო საშუალებები ფართოდაა გავრცელებული და ის დიდი ხნის განმავლობაში სხვადასხვა საშიში ინფექციების თავიდან არიდების კარგი საშუალება იყო. თუმცა ახალი კვლევა მიუთითებს, რომ მის ხშირ გამოყენებას უარყოფითი შედეგებიც აქვს.

მეციერებმა ანტიბიოტიკების მიმართ რეზისტენტული ენტეროკოკი (VRE) აღმოაჩინეს, რომელსაც გამძლეობა უკვე ალკოჰოლის მიმართაც აქვს.

"ეს საავადმყოფოებისთვის განგაშის ზარი უნდა იყოს. ცოტა ხანში ანტიბიოტიკებისადმი რეზისტენტულ ენტეროკოკებთან ბრძოლაში ალკოჰოლი უსარგებლო გახდება", - ამბობს კვლევის თანაავტორი ტიმოთე სტინერი.

ის საავადმყოფოებს ქლორზე დაფუძნებული სადეზინფექციო საშუალებების გამოყენებას და პაციენტების უფრო მკაცრად გაკონტროლებას ურჩევს.

VRE-ს ერთ-ერთი ყველაზე გავრცელებული სახეობა Enterococcus faecium-ია. მისით გამოწვეული ინფექციები სერიოზული საფრთხის შემცველი შეიძლება იყოს და ის ზოგჯერ სიკვდილითაც სრულდება.

"ამ ტიპის ბაქტერიებს კუჭ-ნაწლავის სისტემის დაინფიცირება შეუძლიათ, საიდანაც ისინი სისხლშიც ხვდებიან და ზოგჯერ სეფსისსაც იწვევენ. მისი განკურნება ძალიან რთულია, რადგან ის თითქმის ყველა ანტიბიოტიკისადმი რეზისტენტულია. განსაკუთრებული რისკის ქვეშ კი იმუნოდაქვეითებული ადამიანები იმყოფებიან", - აღნიშნავს პროფესორი სტინერი.

კვლევა ავსტრალიის საავადმყოფოებსა და ლაბორატორიებში ჩატარდა. მეცნიერებმა ერთი და იმავე ბაქტერიის ნიმუში 1997 წლიდან მოყოლებული 2015 წლის ჩათვლით აიღეს. მათ შენიშნეს, რომ 2010 წელს აღებულ ნიმუშებთან შედარებით, 2015 წლის ეგზემპლარი 10-ჯერ გამძლე იყო ალკოჰოლისადმი.

ახლა მნიშვნელოვანია, შედეგები სხვა ქვეყნებშიც გადამოწმდეს.