ბათუმის საქალაქო სასამართლომ ოჯახში ძალადობისთვის ბრალდებულს 2 წლით თავისუფლების აღკვეთა მიუსაჯა. მსჯავრდებული 1 წელს სასჯელაღსრულების დაწესებულებაში მოიხდის, ხოლო 1 წელი ჩაეთვალა პირობით იმავე გამოსაცდელი ვადით.

საქმის მასალების თანახმად, 18 თებერვალს, დაახლოებით 17 საათზე, ნასვამ მდგომარეობაში მყოფმა პირმა ქობულეთის მუნიციპალიტეტში, მისსავე საცხოვრებელ სახლში ცოლზე შვილის თანდასწრებით ფსიქოლოგიურად იძალადა.

პროკურატურის ცნობით, ქმარი ცოლს შეურაცხმყოფელი და დამამცირებელი დამოკიდებულებით, აგრესიით აიძულებდა გარკვეული მოქმედების შესრულებას, შემდეგ კი დაზარალებულზე ფიზიკურასაც იძალადა, სახეში დაარტყა, ყელში წაუჭირა ხელი, ძირს დააგდო და სცემა.

სასამართლოში ასევე დადგინდა, რომ ქმარი ცოლზე არასრულწლოვანი შვილების თანდასწრებით ფსიქოლოგიურად და ფიზიკურად სისტემატურად ძალადობდა.

დაკავებულს ბრალდება სისხლის სამართლის კოდექსის 1261 მუხლის მე-2 ნაწილის „ბ“ ქვეპუნქტით (ოჯახის ერთი წევრის მიერ ოჯახის სხვა წევრის მიმართ ძალადობა, სისტემატური შეურაცხყოფა, ჩადენილი არასრულწლოვანის თანდასწრებით, რამაც გამოიწვია ფიზიკური ტკივილი) წარედგინა.