შინაგან საქმეთა სამინისტროს განცხადებით, სამართალდამცავებმა ტაქსის მძღოლი ქალზე ძალადობის, გაუპატიურებისა და ძარცვის ბრალდებით დააკავეს.

უწყების განცხადებით, დაკავებულია 1981 წელს დაბადებული, წარსულში ძალადობისთვის ნასამართლევი პირი. შსს-ს განცხადებით, ნაძარცვი ნივთები ნივთმტკიცების სახით ამოიღეს და დანიშნულია შესაბამისი ექსპერტიზები.

შსს-ს ცნობით, გუშინ, 30 ივლისს, ღამით, ახალგაზრდა ქალმა გლდანში მდებარე ერთ-ერთი ავტოგასამართი სადგურის ოპერატორს დახმარება სთხოვა, მან გააჩერა საპატრულო პოლიციის ეკიპაჟი, ძალადობის შესახებ აცნობა და პატრულ-ინსპექტორებს ტაქსის მძღოლის მონაცემები აღუწერა.

ქალი სხეულზე მიყენებული დაზიანების გამო საავადმყოფოში გადაიყვანეს.

გამოძიება ძალადობის, გაუპატიურების და ძარცვის ფაქტებზე, საქართველოს სისხლის სამართლის კოდექსის 126-ე მუხლის 1-ლი ნაწილით, 137-ე მუხლის 1-ლი ნაწილით და 178-ე მუხლის მე-2 ნაწილის ა ქვეპუნქტით მიმდინარეობს. დანაშაული 6-დან 8 წლამდე ვადით თავისუფლების აღკვეთას ითვალისწინებს.