ფინანსთა სამინისტროს საგამოძიებო სამსახურმა დიდი ოდენობით კონტრაბანდული საქონლის ტრანზიტულად შემოტანის ბრალდებით ორი პირი დააკავა.

საგამოძიებო სამსახურის ინფორმაციით, ერთ-ერთი ბრალდებულს, კონკრეტული კომპანიის სახელით, არაბთა გაერთიანებული საემიროებიდან საქართველში 773 190 ლარის ოდენობის პროტეინი ტრანზიტით შემოჰქონდა. მათივე ცნობით, ფოთის საზღვაო ნავსადგურის გავლით საქონლის შემოტანისას ბრალდებულმა საბაჟო დეკლარაციაში ყალბი მონაცემები დააფიქსირა, თითქოს 11 250კგ რძის ფხვნილი შემოიტანა.

რაც შეეხება მეორე ბრალდებულს, მას საგამოძიებო სამსახური არადეკლარირებული ტექსტილის ტრანზიტით შემოტანას ედავება. მათი თქმით, ბრალდებულმა ნაწარმი საქართველოში საბაჟო გამშვები პუნქტი სარფის გავლით სატვირთო ავტომობილით შემოიტანა. მათივე ცნობით, ამოღებული საქონლის საერთო ღირებულება 63 988 ლარია.

საქართველოს სისხლის სამართლის კოდექსის 214-ე მუხლის მეორე ნაწილის მიხედვით, საქართველოს საბაჟო საზღვარზე დიდი ოდენობით მოძრავი ნივთის გადატანა ან გადმოტანა მალულად ითვალისწინებს თავისუფლების აღკვეას 5-დან 7 წლამდე ვადით.