შინაგან საქმეთა სამინისტროში ხორავას საქმესთან დაკავშირებით საგამოძიებო კომისიის მიერ გავრცელებულ განცხადებას პასუხობს, რომლის თანახმადაც საქმეში ახალი გარემოებები გამოიკვეთა. უწყების განცხადებით, პირები, რომელთგან მოპოვებული ინფორმაციის საფუძველზეც კომისიამ განცხადება გაავრცელა, შსს-ს უკვე გამოკითხული ჰყავს.

მათივე თქმით, გამოკითხვის შედეგად მოპოვებულია გარკვეული ინფორმაცია, რომლის გადამოსამოწმებლად მიმდინარეობს საგამოძიებო მოქმედებები. უწყებაში ამბობენ, რომ საგამოძიებო კომისიას არ აქვს სამინისტროს მიერ გამოყოფილი საქმის გამოძიების ფარგლებში მოპოვებული ყველა ინფორმაცია, ვინაიდან მტკიცებულებების შეკრება ყოველდღიურ რეჟიმში ხდება.

უწყებაში ამბობენ, რომ 2018 წლის 18 ივლისს შინაგან საქმეთა სამინისტრომ წერილობით მიმართა საგამოძიებო კომისიას და შესთავაზა გაუთქმელობის ხელწერილის საფუძველზე დამატებით მასალის, მათ შორის მათ მიერ დღეს მედია საშუალებებით გაჟღერებული ინფორმაციის გადაცემა, რაზეც კომისიიდან პასუხი სამინისტროს ამ დრომდე არ მიუღია.

ხორავას ქუჩის საქმეზე შექმნილი დროებით საგამოძიებო კომისიის წევრის, ელენე ხოშტარიას თქმით, არასრულწლოვნებისა და ძირითადი მოწმეების დაკითხვისას ახალი საკვანძო გარემოებები გამოიკვეთა.

მისივე თქმით, მყისიერი რეაგირებისთვის ამ ახალი გარემოებების შესახებ მათ უკვე აცნობეს შინაგან საქმეთა სამინისტროს. თუმცა გამოძიების ინტერესებიდან გამომდინარე დეტალების გამხელაზე უარს ამბობენ.

დიმიტრი ცქიტიშვილის თქმით, არასრულწლოვნების დაკითხვისას მათ ახალი ვერსია გაუჩნდათ, რომელიც შსს-ს შეატყობინეს.