საქართველოს ფინანსთა მინისტრი ივანე მაჭავარიანი მიიჩნევს, რომ დღევანდელი მოვლენები სვანეთში ხე-ტყის გონივრული დაცვის დასტურია.

"ეკოლოგიური პრობლემები გაცილებით უფრო მნიშვნელოვანია, ვიდრე ეკონომიკური და ჩვენ მიგვაჩნია, რომ ჩვენს ხეს სჭირდება გონივრული დაცვა", - განაცხადა მაჭავარიანმა.

მაჭავარიანის თქმით, ფინანსთა სამინისტროს საგამოძიებო სამსახური ხე-ტყის უკანონოდ ჭრის აღკვეთის მიმართულებით მუშაობის გაგრძელებას აპირებს.

ფინანსთა სამინისტროს საგამოძიებო სამსახურის მიერ გავრცელებული ინფორმაციით, ხის მასალის უკანონო რეალიზაციის ბრალდებით, სისხლის სამართლის პასუხისგებაში მისცეს 15 პირი. ხაიშსა და ჭუბერში კი ხე-ტყის უკანონო ჭრასთან დაკავშირებით სპეცრაზმი შევიდა. პრემიერ-მინისტრმა, მამუკა ბახტაძემ დღეს, 26 ივლისს გამართულ ბრიფინგზე თქვა, რომ მთავრობა შეურიგებელი იქნება ყველა იმ პირი მიმართ, ვინც ჩართულია ხე-ტყის უკანონოდ ჭრაში.