საქართველოს პარლამენტის თავმჯდომარის პირველი მოადგილის, თამარ ჩუგოშვილის თქმით, საქართველოს მესამე პრეზიდენტის, მიხეილ სააკაშვილის განცხადება ბიძინა ივანიშვილის დიპლომატიურ კორპუსთან შეხვედრის შესახებ, "საქართველოში აკრედიტებული ელჩების შეურაცხყოფა და მათი სახელით მანიპულირებაა".

თამარ ჩუგოშვილის განცხადებით, ბიძინა ივანიშვილის შეხვედრა დიპლომატიურ კორპუსთან მისი ორგანიზებული იყო და რამდენიმე ადამიანთან ერთად თავიდან ბოლომდე ესწრებოდა.

"პრეზიდენტის არჩევნებზე ბიძინა ივანიშვილის პოზიციამ გამოიწვია აღფრთოვანება ელჩებში და ამას ვამბობ ყოველგვარი გადაჭარბების გარეშე. მან გააჟღერა ზუსტად იგივე პოზიცია, რაც თქვა ეთერში, საჯაროდ, ინტერვიუს დროს", - განაცხადა თამარ ჩუგოშვილმა.

საქართველოს მესამე პრეზიდენტი მიხეილ სააკაშვილი საზოგადოებრივი მაუწყებლის ეთერში გასულ ივანიშვილის ინტერვიუს გამოეხმაურა. მიხეილ სააკაშვილის თქმით, დასავლეთის ქვეყნების ელჩებმა ივანიშვილს უთხრეს, რომ თუ ის დააყენებდა კანდიდატურას, ეს იქნებოდა ძალიან ცუდი.

"პრაქტიკულად დააშანტაჟეს და დაემუქრნენ. ამიტომ, შეიძლება დასავლეთის ზეწოლით, მან შემოაგდოს ვიღაც კანდიდატი, ან ერთი ან ორი, რომელიც ვითომ მისი არაა, მაგრამ სინამდვილეში, რა თქმა უნდა, მისი იქნება", - განაცხადა მიხეილ სააკაშვილმა.

ბიძინა ივანიშვილმა ქართული ოცნების საპრეზიდენტო კანდიდატის შესახებ საკუთარი პოზიცია გააჟღერა და განაცხადა, რომ დემოკრატიული პროცესები ხელშეწყობისთვის, პრეზიდენტობის კანდიდატი გუნდიდან არ უნდა დასახელდეს.

მისი თქმით, მისი პოზიციაა, რომ დამოუკიდებელ ღირსეულ კანდიდატს დაუჭირონ მხარი და თუ ასეთი არ იქნება, არავის დაუჭირონ მხარი და "ოპოზიციამ გაინაწილოს ეს ინსტიტუტი".

ივანიშვილის პოზიციას პრეზიდენტობის კანდიდატის შესახებ, 26 ივნისის მთავრობის სხდომის დაწყებამდე გამოეხმაურა და დაეთანხმა საქართველოს პრემიერ-მინისტრი მამუკა ბახტაძე. მან ივანიშვილის ხაზი გააგრძელა და თქვა, რომ "დემოკრატიისთვის უკეთესი იქნება, თუ არჩევნებზე ოცნებას კანდიდატი არ ეყოლება".