საქართველოს თავდაცვის მინისტრად სახელმწიფო უსაფრთხოების სამსახურის ხელმძღვანელის მოადგილის, ლევან იზორიას დანიშვნის შემდეგ, მის მოადგილეებად შინაგან საქმეთა სამინისტროს თანამშრომლები დაინიშნნენ. პრემიერმა გიორგი კვირიკაშვილმა 2 აგვისტოს ხელი მოაწერა ბრძანებებს, რომლის მიხედვითაც, თავდაცვის მინისტრის პირველ მოადგილედ შსს-ს ადმინისტრაციის უფროსი, ლელა ჩიქოვანი დაინიშნა, ხოლო მოადგილედ შინაგან საქმეთა სამინისტროს პოლიციის აკადემიის რექტორი ნუკრი გელაშვილი.

ლელა ჩიქოვანი შსს-ს ადმინისტრაციის უფროსის პოსტის დაკავებამდე იყო საქართველოს თავდაცვის ატაშე ლიტვის, ლატვიის, ესტონეთის და პოლონეთის რესპუბლიკებში, ის ასევე მუშაობდა შს სამინისტროში სხვადასხვა პოზიციაზე. ჩიქოვანი წოდებით ვიცე-პოლკოვნიკია, მას დამთავრებული აქვს გაერთიანებული სამეფოს თავდაცვის აკადემია, აშშ-ს უმაღლესი საზღვაო სკოლა, ჰარვარდის უნივერსიტეტის მმართველობის სკოლა, ნატოს სკოლა, შვედეთის თავდაცვის ეროვნული სკოლა, საქართველოს თავდაცვის აკადემია.

რაც შეეხება ნუკრი გელაშვილს, ის პროფესიით იურისტია და წლების განმავლობაში ეწეოდა აკადემიურ საქმიანობას სხვადასხვა ქართულ უნივერსიტეტში.

თავდაცვის ყოფილმა მინისტრმა თინა ხიდაშელმა მის შემცვლელად ლევან იზორიას დანიშვნა უარყოფითად შეაფასა. ხიდაშელის თქმით, "ძალიან ცუდი გზავნილი იქნება დასავლელი პარტნიორებისთვის ის, რომ უშიშროების კადრი მივიდა თავდაცვის უწყებაში.