საქართველოს ადვოკატთა ასოციაციის თავმჯდომარე დავით ასათიანი სმიტების ოჯახის საქმეზე ადვოკატის ჩამოშორების საკითხს განცხადებით გამოეხმაურა.

ასათიანის თქმით, დაუშვებელია ადვოკატის მხრიდან დაცვის უფლების განხორციელებაზე უარის თქმა, თუმცა არსებობს გამონაკლისები.

"არსებობს გამონაკლისები, როცა ადვოკატსა და კლიენტს შორის წარმოიშობა ინტერესთა კონფლიქტი, ადგილი აქვს პოზიციების შეუთანხმებლობას ანდა მათ შორის აღარ არსებობს ნდობა", - აცხადებს დავით ასათიანი.

მისი თქმით, ადვოკატ დავით გირგვლიანის ზღვარგადასული კრიტიკა მიუღებელია, მაშინ როცა ადვოკატი პროფესიული საიდუმლოების დაცვის ვალდებულებიდან გამომდინარე დეტალებზე ვერ საუბრობს.

"უცნობია საადვოკატო დახმარების შეწყვეტის რეალური მიზეზები და ამასთან, თავად ბრალდებულის და მისი ოჯახის წევრთა მხრიდან ადვოკატის მიმართ პრეტენზიები არ გამოთქმულა, მიუღებელია ადვოკატის ზღვარგადასული კრიტიკა, მაშინ როცა ადვოკატი მოკლებულია შესაძლებლობას დაასახელოს მისი გადაწყვეტილების კონკრეტული მიზეზები პროფესიული საიდუმლოების დაცვის ვალდებულებიდან გამომდინარე", - აცხადებს ადვოკატთა ასოციაციის თავმჯდომარე.

სმიტების ოჯახის მკვლელობის საქმეზე ბრალდებულის, კობა ბექაურის ადვოკატმა მის დაცვაზე უარი განაცხადა და საქმეს ჩამოშორდა. ადვოკატმა გადაწყვეტილება მხარეებს შორის არსებული ინტერესთა კონფლიქტით ახსნა. დავით გირგვლიანის განცხადებას წინ უსწრებდა რუსთავი 2-ისა და იმედის მიერ მოპოვებული ექსპერტიზის დასკვნა სმიტების მკვლელობის საქმეში. ამ დასკვნის მიხედვით, ლორა სმიტის სხეულში აღმოჩენილია ამ საქმეზე დაკავებულის დნმ, შვილი კი თოფის მიბჯენითაა მოკლული.

საქმის დეტალები

შინაგან საქმეთა სამინისტროს ინფორმაციით, 6 ივლისს, 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ. შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა სოფელ წკერეში დაკარგული ტურისტების კუთვნილი ავტომანქანა და პირადი ნივთები აღმოაჩინეს. მაშველებმა დაკარგული ტურისტი ქალი, ავტომანქანიდან, დაახლოებით, 3 კილომეტრში, ხევში, ჩანჩქერის ძირში გარდაცვლილი 6 ივლისს იპოვეს. რაიან სმიტის ცხედარი 7 ივლისს, ხევში მდებარე ჩანჩქერის მიმდებარე ტერიტორიაზე ნახეს. იქვე ახლოს ნახეს მათი კუთვნილი ნივთებიც, ჩანთაც და ფულიც. რამდენიმე საათის შემდეგ ნახეს მათი 4 წლის შვილის გვამიც.

რაიან სმიტი მეუღლესთან ერთად დაახლოებით 7 წელია, რაც საქართველოში, მარნეულში ცხოვრობდა და აზერბაიჯანული ხალიჩების ბიზნესით იყო დაკავებული.

ამ საქმეზე ბრალდებულ მალხაზ კობაურს სასამართლომ აღკვეთის ღონისძიებად პატიმრობა შეუფარდა. დაკავებული დანაშაულის ჩადენას არ აღიარებს