ბრიტანული მუსიკალური ბენდის Oasis-ის ყოფილი წევრი, ლიამ გალაგერი, თავის ძმას, ნოელს ჯგუფის აღდგენისკენ მოუწოდებს და დასძენს, რომ მას ყველა შეცდომა აპატია.

"მოდი დავაბრუნოთ დიდი O, სასმელი ჩემზეა", - წერს ის ტვიტერზე.

როგორც აღმოჩნდა, მან ნოელისგან პასუხი ვერ მიიღო და რამდენიმე საათის შემდეგ დაწერა:

"ამას არად მივიღებ".

თავად ნოელი ნოემბერში ამბობდა, რომ ოაზისში აღარასდროს დაუკრავდა.

ბენდი 1991 წელს ჩამოყალიბდა და 2009 წელს დაიშალა, რისი მიზეზიც, სწორედ ძმებს შორის არსებული უთანხმოება იყო.

ლიამს ლარინგიტი [ხორხის ანთება] ჰქონდა, რის გამოც ფესტივალის ჩაშლა მოუწიათ. მაშინ ნოელმა თქვა, რომ ამის მიზეზი ის იყო, რომ ლიამი ნაბახუსევზე იყო. ლიამმა ძმას უჩივლა და განაცხადა, რომ ნოელმა შეგნებულად იცრუა და მან დილით ექიმის დიაგნოზი მასთან ერთად მოისმინა. მოგვიანებით ნოელმა ბოდიში მოიხადა და ლიამმა სარჩელი გამოიტანა.

ძმებს შორის დაძაბულობა მაშინ გაიზარდა, როდესაც ლიამმა ნოელს თავში ქლიავი ესროლა და შემდეგ მის გიტარას იქნევდა. "კინაღამ სახეში გამარტყა", - მოუყვა ნოელი მედიას.

მარცხნიდან მარჯვნივ: ნოელ და ლიამ გალაგერები

ფოტო: Giuseppe Aresu / Shutterstock

ამის შემდეგ, ჯგუფის მენეჯერმა პარიზში დაგეგმილი კონცერტი გააუქმა და განაცხადა, რომ ოაზისი აღარ არსებობდა.

"ეს ჩემთვის ერთდროულად სევდიანი და შვებისმომგვრელი ამბავია. დღეს ოაზისი დავტოვე. ხალხს შეუძლია ის თქვას, რაც სურს, მაგრამ მე ლიამთან ერთად მუშაობა ერთი დღითაც კი აღარ შემიძლია".

ვნახოთ, დატოვებენ თუ არა წყენას ძმები წარსულში და მოვისმენთ თუ არა მათი შესრულებით ისეთ საოცარ ჰიტებს კიდევ ერთხელ, როგორებიცაა მათივე დაწერილი Wonderwall და Don't Look Back in Anger.

ამ დროისთვის, ნოელს თავისი ბენდი აქვს, Noel Gallagher's High Flying Birds, რომელსაც ცოტა ხნის წინ ჰქონდა კონცერტი ედინბურგში. ლიამმა კი, 2017 წელს სოლო ალბომი გამოუშვა, რომელმაც ჩარტებში წარმატება მოიპოვა.