"ისეთი შთაბეჭდილება მრჩება, რომ შეგნებულად დაასახელა ნაციონალურმა მოძრაობამ სუსტი კანდიდატი", - ამის შესახებ ჟურნალისტებს საქართველოს პარლამენტის თავმჯდომარემ, ირაკლი კობახიძემ განუცხადა.

პარლამენტის თავმჯდომარე ფიქრობს, რომ შესაძლოა, კანდიდატის დასახელების უკან გარკვეული გათვლებიც იყოს:

"იყო გარკვეული საუბრები, ეჭვები იმასთან დაკავშირებით, რომ ნაციონალური მოძრაობა გეგმავდა საკუთარი კანდიდატურის მოხსნას კონკრეტული კანდიდატის სასარგებლოდ და თქვენ შეგიძლიათ მარტივად იმსჯელოთ იმის თაობაზე, თუ ვინ შეიძლება იყოს ეს კანდიდატი, ვინ შეიძლება იყოს ყველაზე მეტად მისაღები ნაციონალური მოძრაობისათვის. ეს ეჭვები გარკვეულწილად გაამყარა წარდგენილმა კანდიდატმა".

გაერთიანებულმა ოპოზიციამ "ძალა ერთობაშია", რაც 10 პოლიტიკურ პარტიას აერთიანებს, პრეზიდენტობის კანდიდატად ენმ-ს პოლიტსაბჭოს წევრი გრიგოლ ვაშაძე დაასახელა. ოპოზიციურმა მოძრაობამ პრეზიდენტობის კანდიდატი დღეს, 17 ივლისს წარადგინა.

გრიგოლ ვაშაძე 2017 წლიდან ერთიანი ნაციონალური მოძრაობის პოლიტსაბჭოს წევრია. ის 2008 წელს, წინა მთავრობის დროს საგარეო საქმეთა მინისტრის პოსტს იკავებდა, მანამდე კი კულტურის მინისტრი იყო.