როგორც იქნა, Microsoft ყველასთვის ცნობილ ტექსტურ ედიტორს, Notepad-ს განაახლებს. პროგრამა 1980-იანი წლებიდან Windows-ის განუყოფელი ნაწილია.

გასულ წელს Microsoft-მა სახატავი პროგრამა Paint-ც განაახლა. საზოგადოების დიდი ნაწილი მიიჩნევდა, რომ ზედმეტად მასშტაბურ განახლებას შეიძლება პროგრამის პოპულარობაზე ცუდად ემოქმედა, თუმცა Microsoft-მა პროგრამაში ახალი დიზაინი, მეტი შესაძლებლობები და 3D ობიექტების მართვის შესაძლებლობა ისე ჩააშენა, რომ ის კვლავ მარტივად გამოსაყენებელი დარჩა და ეს განახლება წარმატებული გამოდგა.

ახლა კი Notepad-ის ახალი ვერსიის დროც დადგა. წინასწარ ინფორმაციაზე დაყრდნობით ვიცით, რომ განახლდება მისი დიზაინი რათა ის Microsoft-ის ახალ პროდუქტებთან თავსებადობაში იყოს. ასევე დაემატება ტექსტის გადიდების ფუნქცია. გარდა ამისა, ახალ ვერსიაში იქნება ე.წ. ვერტიკალური სქროლი და სიტყვების უფრო ეფექტური ძებნის სისტემა.

განახლების საჯაროდ გამოშვება ამ წლის ოქტომბერში იგეგმება.