საქართველოს განათლების, მეცნიერების, კულტურისა და სპორტის მინისტრობის კანდიდატმა მიხეილ ბატიაშვილმა გაერთიანებული კომიტეტების სხდომაზე განათლების სისტემაში უკვე არსებულ რეფორმებზე ისაუბრა. მან სიტყვით გამოსვლის დროს ყურადღება გაამახვილა, რომ კონკრეტული პრობლემური მიმართულებებით წინამორბებების მიერ დაწყებულ ინიციატივებზე "იცის", თუმცა საკითხი არ გაუგრძელებია და საკუთარი ხედვა ან შეფასება ზოგადი და უმაღლესი განათლების სფეროებში მიმდინარე პროცესებზე არ დაუფიქსირებია.

მინისტრობის კანდიდატის განცხადებით, მან კონცეფცია ჯერ არ ჩამოუყალიბებია და ამ მიმართულებით აქტიურ მუშაობას 16 ივლისიდან დაიწყებს. მან გამოსვლის დროს რამდენჯერმე გაიმეორა და კონკრეტული მიმართულებებით ინიციატივები "მოსაფიქრებელია".

გთავაზობთ იმ ინიციატივების სიას განათლების სისტემაში, რომლის შესახებაც მინისტრობის კანდიდატმა "იცის":

  • ვიცი, რომ სასწავლო გეგმების განახლება მოხდა და ახალი სახელმძღვანელოები შეაქვთ სკოლაში;
  • ვიცი, რომ პედაგოგების გადამზადება მიმდინარეობს ახალი სასწავლო გეგმების მიხედვით;
  • ვიცი, რომ სახელმძღვანელოების წონის პრობლემა იყო. სპორტსმენი უნდა ყოფილიყავი, რომ ჩანთები გეტარებინა;
  • როგორც ვიცი, უსაფრთხო სკოლის მიმართულებით მუშაობა დაწყებულია, იგივე მანდატურების გადამზადება;
  • ვიცი, რომ რესურსცენტრებში გაჩნდა ფსიქოლოგების შტატები, რომლებიც რესურს-ცენტრებიდან უნდა მოემსახურონ სკოლებს;
  • როგორც ვიცი, მასწავლებლის ანაზღაურების სისტემის გადასახედად მუშაობა მიდის, თუმცა ამ მიმართულებით სამუშაოა;
  • ვიცი, რომ საქართველოში 10 000-ზე მეტი უცხოელი სტუდენტი სწავლობს, მაგრამ ეს მიმართულება კიდევ უფრო გასაძლიერებელია.