შინაგან საქმეთა სამინისტროს განცხადებით, დღეს, 10 ივლისს ავტობუსში 17 წლის მოზარდის დაჭრის ბრალდებით დაკავებულია 2002 წელს დაბადებული პირი.

უწყების ცნობით, ბრალდებულმა პოლიტკოვსკაიას ქუჩაზე მდებარე ავტობუსის გაჩერებასთან, #140 ავტობუსში მგზავრობისას, ურთიერთშელაპარაკების ნიადაგზე, 2000 წელს დაბადებულ პირს ცივი იარაღით მუცლის არეში ერთი ჭრილობა მიაყენა და შემთხვევის ადგილიდან მიიმალა.

დაჭრილი სასწრაფო სამედიცინო ბრიგადის თანამშრომლებმა სტაციონარში გადაიყვანეს, სადაც მას გადაუდებელი ოპერაცია ჩაუტარდა.

შსს-ს განცხადებით, პოლიციამ დანაშაულის ჩადენის იარაღი - დანა ნივთმტკიცებად ამოიღო.

პაციენტის მკურნალი ექიმი On.ge-სთან საუბრისას ამბობს, რომ 17 წლის ბიჭი საავადმყოფოში პოლიტრავმით შევიდა. მას ჭრილობით რამდენიმე ორგანო ჰქონდა დაზიანებული. საავადმყოფოში ამბობენ, რომ მოზარდი ამჟამად რეანიმაციაშია გადაყვანილი.

გამოძიება საქართველოს სისხლის სამართლის კოდექსის 108-ე მუხლით მიმდინარეობს. დანაშაული 7-დან 10 წლამდე თავისუფლების აღკვეთას ითვალისწინებს.