საქართველოს პრეზიდენტმა, გიორგი მარგველაშვილმა მესტიაში სტიქიური უბედურებით გამოწვეულ საგანგებო სიტუაციაზე რეაგირების მიზნით, საქართველოს სამხედრო ძალების გამოყენების ბრძანება გამოსცა.

ბრძანებაში აღნიშნულია, რომ საქართველოს კონსტიტუციის მე-100 მუხლის პირველი პუნქტის თანახმად, გამოყენებულ იქნეს საქართველოს სამხედრო ძალების შემდეგი ქვედანაყოფები:

  • საქართველოს შეიარაღებული ძალების სახმელეთო ჯარების აღმოსავლეთ სარდლობა;
  • საქართველოს შეიარაღებული ძალების გენერალური შტაბის ჯარების ლოგისტიკური უზრუნველყოფის სარდლობა.

საქართველოს კონსტიტუციის მიხედვით, პრეზიდენტის ბრძანება პარლამენტმა უნდა დაამტკიცოს.

საქართველოს პარლამენტის აპარატის ინფორმაციით, ამ საკითხთან დაკავშირებით, თბილისში, პარლამენტის შენობაში 8 ივლისს ბიუროს სხდომა გაიმართება, მოგვიანებით კი თავდაცვისა და უშიშროების კომიტეტის სხდომა. 8 ივლისს 17:30 საათზე ქუთაისში მდებარე პარლამენტის შენობაში საგანგებო სხდომა ჩატარდება, სადაც პრეზიდენტის ბრძანების შესახებ იმსჯელებენ.

5 ივლისს უხვი ნალექის შედეგად, სოფელ ჭუბერში მთის ნაწილის ჩამოშლამ მდინარე ნენსკრას ადიდება გამოიწვია. მდინარის კალაპოტიდან გადმოსვლის გამო დაიტბორა მიმდებარე ტერიტორია, რამაც ათეულობით თემი გარე სამყაროს მოწყვიტა. უხვმა ნალექმა ჩამორეცხა სოფლებს შორის დამაკავშირებელი საავტომობილო გზები.