საქართველოს მთავრობის ადმინისტრაციის განცხადებით, საჭიროების შემთხვევაში ჭუბერში, სტიქიის ზონიდან მოსახლეობის ევაკუაცია განხორციელდება, ამჟამად კი მდგომარეობა კონტროლს ექვემდებარება.

განცხადებაში ვკითხულობთ, რომ სამეგრელო-ზემო სვანეთის რეგიონში, სოფელ ჭუბერში, მდინარე ნენსკრას ადიდების შედეგად მომხდარი სტიქიის სალიკვიდაციო სამუშაოებში ჩართულია ყველა შესაბამისი უწყება და სამსახური.

"საგანგებო სიტუაციების მართვის სააგენტოში დაშავებულთა შესახებ ინფორმაცია არ შესულა", - ნათქვამია განცხადებაში.

მესტიის მუნიციპალიტეტის სოფელ ჭუბერში, იქ სადაც ნენსკრა ჰესი შენდება, დღეს, 5 ივლისს მთის ნაწილი ჩამოიშალა, რამაც ღვარცოფი გამოიწვია. საგანგებო სიტუაციების მართვის სამსახურის განცხადებით, მთის ნაწილის ჩამოშლა უხვმა ნალექმა გამოიწვია.