NDI-მ საზოგადოებრივი აზრის კვლევის ფარგლებში მოქალაქეებს ჰკითხა, თუ რომელი პარტია დგას მათ შეხედულებებთან ყველაზე ახლოს.

გამოკითხულთა 27 პროცენტი პასუხობს, რომ არცერთი. მოქალაქეთა 19 პროცენტმა ასეთ პარტიად ქართული ოცნება - დემოკრატიული საქართველო დაასახელა, ხოლო ნაციონალური მოძრაობა მოქალაქეთა 15 პროცენტის შეხედულებებთან აღმოჩნდა ყველაზე ახლოს.

აღნიშნულ კითხვაზე პასუხი არ აქვს 10 პროცენტს, ხოლო 5 პროცენტი ასეთ პარტიად პაატა ბურჭულაძის პარტიას ასახელებს. იგივე რაოდენობამ პატრიოტთა ალიანსი დაასახელა თავის შეხედულებებთან ყველაზე ახლოს მდგომ პარტიად, რაც შეეხება თავისუფალ დემოკრატებს, ისინი გამოკითხულთა 4 პროცენტმა დაასახელა, ასევე 4 პროცენტი ასახელებს ლეიბორისტებს, ხოლო 6 პროცენტი - ჯამში ყველა სხვა პარტიას.

NDI-ის კვლევის საველე სამუშაოები CRRC- საქართველომ ჩაატარა 2016 წლის 8 ივნისიდან 6 ივლისის პერიოდში. სულ მომზადდა 4 113 დასრულებული ინტერვიუ. განხორციელდა წარმომადგენლობითი შერჩევა ქვეყნის მასშტაბით, ამასთან, დამატებითი წარმომადგენლობითი შერჩევა თბილისში, ქალაქისა და სოფლის ტიპის დასახლებებში, ეროვნული უმცირესობებით მჭიდროდ დასახლებულ რეგიონებში. კვლევის საშუალო ცდომილების ზღვარი არის +/- 2,1%.