საქართველოს პრემიერ-მინისტრის, მამუკა ბახტაძის განცხადებით, განათლების სფეროში ინვესტიციები მინიმუმ სამჯერ უნდა გაიზარდოს.

პრემიერის აზრით, განათლების სისტემა ისე უნდა განვითარდეს, რომ ეკონომიკაში არსებულ გამოწვევებს უპასუხოს.

ბახტაძის თქმით, თუ განათლებაში ინვესტიციები მნიშვნელოვნად არ გაიზრდება, განვითარებული ეკონომიკის მქონე ქვეყანა საქართველო ვერ გახდება.

"ჩვენ შეგვიძლია დავამარცხოთ სიღარიბე არსებული რეფორმებით, ზრდის იმ ტენდენციებით, რაც გვაქვს, მნიშვნელოვნად შევამციროთ ღარიბი ოჯახების რაოდენობა, მაგრამ ვერ გავხდებით განვითარებული ეკონომიკის მქონე ქვეყანა. ამისთვის ჩვენ გვჭირდება მეტი ინვესტიციები განათლებაში, მათ შორის, ისეთ სასწავლებლებში, რომლებიც რეგიონებში მდებარეობს. ჩვენ გვინდა მივაღწიოთ ინკლუზიურ ზრდას, სადაც ყველა მოქალაქეა ჩართული. ინვესტიციები უნდა გავზარდოთ, მინიმუმ, სამჯერ და მეტჯერ, თუ ეკონომიკა ამის საშუალებას მოგვცემს", - განაცხადა მამუკა ბახტაძემ.