ხორავას ქუჩის საქმეზე შექმნილი პარლამენტის საგამოძიებო კომისიის თავმჯდომარის, სერგი კაპანაძის თქმით, გამოკვეთილი გარემოებების გათვალისწინებით, შესაძლებელია მიხეილ კალანდიას წინააღმდეგ სისხლისსამართლებრივი დევნა დაიწყოს. კერძოდ, დავით სარალიძის ჯგუფურ მკვლელობაში თანამონაწილეობის კუთხით. ამის შესახებ სერგი კაპანაძემ დაახლოებით ერთი საათის წინ ბრიფინგზე ისაუბრა.

"ეს ინფორმაცია საქმიდან ჩანს, რომ ხელმისაწვდომი იყო პროკურატურისთვის და შინაგან საქმეთა სამინისტროსთვის გამოძიების დასაწყისიდანვე, მაგრამ ეს ნაბიჯი მათ არ გადაუდგიათ", - აღნიშნა კაპანაძემ.

დღეს, 25 ივნისს პარლამენტის საგამოძიებო კომისიამ ხორავას ქუჩის საქმის პროკურორს მოუსმინა. პროკურორმა, ზვიად ფხაკაძემ განაცხადა, რომ მიხეილ კალანდიას ქურთუკის ექსპერტიზა არ ჩატარდა, რადგან საქმეს ახალ დეტალებს არ შემატებდა.

საგამოძიებო კოსმიაში ქართული ოცნების წევრმა, მამუკა მდინარაძემ პროკურორს ჰკითხა რაზე დაყრდნობით გადაწყდა ის, რომ კალანდიას ტანსაცმელზე სისხლის კვალი დამატებით ინფორმაციას არ შეიცავდა. მდინარაძის პასუხად პროკურორმა განაცხადა, რომ გამოძიება ეცადა მოეპოვებინა კალანდიაზე მამხილებელი მტკიცებულებები, მაგრამ ვერ მოიპოვეს ინფორმაცია, რომელიც დაადასტურებდა კალანდიას მხრიდან სარალიძეზე დანის დარტყმას. მიუხედავად ამისა, მან კიდევ ერთხელ განმარტა, რომ სისხლიანი ტანსაცმელი დამატებით მტკიცებულებას არ შემატებდა საქმეს და მხოლოდ არსებულ ინფორმაციას გაამყარებდა.

ამ საქმეზე პარლამენტის საგამოძიებო კომისია მას შემდეგ შეიქმნა, რაც თბილისის საქალაქო სასამართლოს გადაწყვეტილებით ცნობილი გახდა, რომ ხორავას ქუჩაზე მოკლული დავით სარალიძის მკვლელი დაკავებული არ იყო. განაჩენის გამოცხადების შემდეგ დავით სარალიძის მამამ, ზაზა სარალიძემ აქციები დაიწყო.

გაიგეთ მეტი ხორავას ქუჩაზე მომხდარი მკვლელობის შესახებ.