14-დღიანი პატიმრობის შემდეგ, ზვიად კუპრავამ და მისმა მხარდამჭერმა სამმა პირმა საპატიმრო დატოვა. კუპრავამ განაცხადა, რომ სისტემის წინააღმდეგ ბრძოლა გრძელდება. მისი თქმით, ბრძოლამ შედეგი გამოიღო და მთავრობა გადადგა, რადგან მათი დაშინება და მოსყიდვა ვერ შეძლეს. მისივე თქმით, ეს პროცესი ფორმალობაა და დამნაშავეები დაუსჯელები დარჩნენ.

"ეს 14 დღე მე ვიყავი გახარია-ივანიშვილის პირადი პატიმარი. რა თქმა უნდა, ჩემი მხრიდან არანაირ დანაშაულს ადგილი არ ჰქონია. ცხადია, რატომ შედიოდა მათ მიზნებში ჩემი დაკავება. ჩემი დაკავების ერთადერთი მიზანი იყო ტემპერატურის და მუხტის დახშობა, რომელიც იყო რუსთაველზე", – განაცხადა ზვიად კუპრავამ.

11 ივნისს, თბილისში, რუსთაველის გამზირზე პარლამენტის შენობის წინ წვრილმანი ხულიგნობისა და პოლიციელის კანონიერი მოთხოვნისადმი დაუმორჩილებლობის ბრალდებით 4 პირი დააკავეს, მათ შორის ზვიად კუპრავაც. სასამართლომ მათ 14 დღიანი პატიმრობა შეუფარდა.