პარლამენტის რიგგარეშე პლენარულ სხდომაზე ეკა ბესელიამ ერთიან ნაციონალურ მოძრაობას კოლექტიურ მოძალადეები უწოდა.

ბესელია პრემიერობის კანდიდატის, მამუკა ბახტაძის მიერ ნაციონალური მოძრაობისთვის 20 ათასი ლარის გადარიცხვას გამოეხმაურა.

ეკა ბესელიამ აღნიშნა, რომ წინა ხელისუფლების დროს მოქალაქეთა პოლიტიკური გაერთიანების კანონში შევიდა ცვლილებები, რის გამოც იურიდიულ პირებს პოლიტიკური პარტიების დაფინანსების უფლება აღარ ჰქონდათ. ამის შემდეგ ბესელიამ ნაციონალურ მოძრაობას მიმართა:

"დღეს კოლექტიური მოძალადეები მსხვერპლს ეუბნებით, რატომ ხარ მსხვერპლის როლში, რატო გადაირიცხა ის ფული".

სახელმწიფო აუდიტის სამსახურის ინფორმაციით, მამუკა ბახტაძემ 2012 წელს ერთიან ნაციონალურ მოძრაობას 20 ათასი ლარი შესწირა.

მამუკა ბახტაძის განცხადებით, მას 20 ათასი ლარი ნაციონალური მოძრაობისთვის არ შეუწირავს. მისივე თქმით, ის 2011 წლიდან ქართული ოცნების მხარდამჭერია და მისი პირად ანგარიში გადარიცხვისთვის ტექნიკურად გამოიყენეს.

"არა, მე ჩემი თანხა არასდროს არ გადამირიცხავს ნაციონალური მოძრაობისთვის. თქვენ, 2012 წელს, იმიტომ რომ არ ჰქონოდა საშუალება ქართულ ოცნებას დაეფინანსებინა პარტია შეცვალეთ კანონი და იურიდიულ პირებს აუკრძალეთ პარტიების დაფინანსება, ამას მოყვა ცვლილება კანონში", - განაცხადა ბახტაძემ.