შს მინისტრობის კანდიდატმა, გიორგი გახარიამ ფრაქცია ნაციონალურ მოძრაობასთან შეხვედრის დასრულების შემდეგ ჟურნალისტებთან ხორავას ქუჩის საქმეზე ისაუბრა.

მისი თქმით, ნაციონალურ მოძრაობასთან შეხვედრისას ხორავას ქუჩის საქმეზე საუბრისგან თავი განზრახ შეიკავა.

"პასუხისმგებლიანი პოლიტიკური ძალა, რომელსაც აინტერესებს ობიექტური შედეგი, მართლაც, მძიმე ტრაგედიაზე, რომელმაც ეს ქალაქი შეძრა, რა თქმა უნდა, აქ კი არ დააყენებდა ამ შეკითხვებს, არამედ მიიღებდა მონაწილეობას საპარლამენტო კომისიის მუშაობაში და ჩვენ სწორედ ამიტომ ვთქვით, მე სწორედ ამიტომ შევიკავე თავი ჩემს გამოსვლაში ამ თემის გაჟღერებით", - განაცხადა გიორგი გახარიამ.

მისი თქმით, ხორავას ქუჩის საქმეზე საგამოძიებო კომისია რამდენიმე დღეში იწყებს მუშაობა და ამის პარალელურად შსს-ში გამოძიება გრძელდება.

"ჩვენ ერთი რამ უნდა გვესმოდეს, ეს იყო უმძიმესი დღეები, დეკემბრის დასაწყისში. ჩვენ ყველას კარგად გვახსოვს, მაშინ უდიდესი პრობლემა გვქონდა ერთ-ერთი ძებნილის დაკავების. ეს იყო უმძიმესი დღეები ქალაქის პოლიციაში და მთლიანად მთელს სამინისტროში. ჩვენ მაშინ შევძელით მაქსიმალურის გაკეთება რაც იყო შესაძლებელი, თუმცა, რა თქმა უნდა, კანონმდებლობის მხრიდანაც ვიყავით შეზღუდულები - ეს გახლავთ არასრულწლოვნები", - განმარტა შს მინისტრობის კანდიდატმა.

ის ამბობს, რომ გამოძიებას შემჭიდროვებული ვადები ჰქონდა და ამიტომ საქმე ცალკე გამოყო.

"როგორც კი დავინახეთ, რომ შესაძლებელი იყო გარკვეული თემების დადგენა ბოლომდე ვერ მოგვესწრო, და დავიწყეთ ახალი გამოძიება. შემდეგ უკვე სასამართლო პროცესზე, ზოგ შემთხვევაში ჩვენებები შეიცვალა, ზოგ შემთხვევაში გამოვლინდა ახალი გარემოებები. სწორედ ამ ახალი გაგრძელებული და გამოყოფილი გარემოებების ფარგლებში, თქვენ იცით, რომ უკვე ახალი ბრალდებულები გვყავს", - განუცხადა მინისტრობის კანდიდატმა ჟურნალისტებს.

მისივე განმარტებით, დღეს გამოძიება და სამინისტრო ემზადება ყველანაირი განვითარებისთვის ამ გამოძიებაში.

"ჩვენ არ გვაქვს არანაირი შეზღუდვა. ჩვენ არ გვაქვს არანაირი პოსტულატები. ამ საქმეში უკვე 9 ადამიანი არის პასუხისგებაში მიცემული. ჩვენ ვამბობთ, რომ რა თქმა უნდა თუ ამ საქმის ფარგლებში თუ გამოჩნდება მე-3 მე-4 და კიდე რამდენიმე, ჩვენ აღვასრულებთ სამართლიანობას", - განაცხადა გახარიამ.