ქართულმა იდეამ "უხამსი და ამორალური" რეკლამის გავრცელებისთვის ამჯერად მერიას უჩივლა ზედამხედველობის სამსახურში. ორგანიზაციაში მიაჩნიათ, რომ ბარათაშვილის ხიდზე დახატული სტენსილები ზნეობრივ და ჰუმანურ ნორმებს არღვევს და მას ბავშვები არ უნდა ხედავდნენ.

ამის ასახსნელად ორგანიზაციის წევრებმა ვიდეო გადაიღეს რომელშიც მათი თქმით, "ამორალურ" ნახატებს აჩვენებენ. როგორც ისინი აცხადებენ, ფილარმონიასთან მდებარე მუზის ქანდაკებაზე FCKGN აბრევიატურის მიწერა ქართული კულტურის შეურაცხყოფაა.

გარდა ამისა მათ მიაჩნიათ რომ სურათი, რომელზეც ორი ქალის კოცნაა გამოსახული და აქვს წარწერა "ჩემი ოჯახიც წმინდაა" არის "უზნეობის პროპაგანდა."

ფოტო: Nino Bolk / FB

ქართული იდეა აპროტესტებს იმ ფაქტსაც, რომ კახა კალაძე დაესწრო ქუჩის ხელოვნების ფესტივალის დახურვას, რომლის ფარგლებშიც აღნიშნული სტენსილები დაიხატა და ნახატები შეაქო.

ქართულმა იდეამ უხამსი რეკლამირებისთვის აქამდეც იჩივლა. კერძოდ, აისსას წინააღმდეგ მერიას მიმართა, მერიამ კი აიისას სასამართლოში უჩივლა. მერიაში მიიჩნიეს, რომ აიისას შეფუთვას, რომელზეც ორთითზეწამოცმული პრეზერვატივიც გამოსახული არასათანადო და არაეთიკური რეკლამა აქვს.

თბილისის სასამართლომ აიისას არაეთიკურობა დაუდგინა და 500 ლარით დააჯარიმა. განაჩენი სააპელაციო სასამართლოში გასაჩივრდა.