ეკა მესხიძე, რომელმაც საჯარო რეესტრის ყოფილი თავმჯდომარე პაპუნა უგრეხელიძე სექსუალურ შევიწროვებაში დაადანაშაულა, აცხადეს, რომ ნებისმიერი სამართლებრივი დავისთვის მზად არის. მისი თქმით, სარჩელი, რომელიც პაპუნა უგრეხელიძემ მის წინააღმდეგ შეიტანა, ჯერ არ ჩაბარებია. ეკა მესხიძე ფიქრობს, რომ თუ სასამართლო პროცესები დაიწყება, უგრეხელიძის დანაშაული უფრო კარგად გამოჩნდება.

"სასამართლოს გზით კიდევ უფრო კარგად გამოაშკარავდება მისი ბინძური და საჯარო მოსამსახურისთვის შეუსაბამო საქციელი და დანაშაული", - უთხრა On.ge-ს ეკა მესხიძემ.

მისი აზრით, პაპუნა უგრეხელიძისა და ზვიად დევდარიანის შემთხვევებმა ქალები უფრო მეტად შეაშინა.

"ისედაც ხმას არ იღებენ, ეშინიათ და რა გამოდის, სახელმწიფოს მხრიდან არ მოხდა მაინც შესაბამისი რეაქცია, არავინ დაუსჯიათ და არავის დაუგმია ეს დანაშაული, ოფიციალურად არც მოხსნეს, თქვა, რომ გადავდექიო, არავინ გამოსულა და არ უთქვამს, რომ ცუდად მოიქცა, ის შეშინებული ქალები კი როგორ ამოიღებენ, ხმას იმის შიშით, რომ იქეთ არ უჩივლონ შემდეგ", - უთხრა On.ge-ს ეკა მესხიძემ.

საჯარო რეესტრის ყოფილი თავმჯდომარე, პაპუნა უგრეხელიძე უჩივის ქალს, რომელმაც ის სექსუალურ შევიწროებაში დაადანაშაულა. ამის შესახებ უგრეხელიძე ფეისბუქის გვერდზე აქვეყნებს დოკუმენტების ფოტოასლებსა და განცხადებას. მისი ცნობით, თბილისის საქალაქო სასამართლომ წარმოებაში მიიღო საქმე ეკატერინე მესხიძის წინააღმდეგ.